Кажне тукымын — шке кумирже. Мутат уке, кызытсе самырык айдемынат тудо уло, но Владимир Высоцкийын усталыкше ондаксе семынак пагытлан келшыше. «Высоцкий: пӱрымаш да усталык паша» сем да поэзий уна пӧлемыште вашлиймашыш 9 номеран школын 11 классыште тунемшышт лийыныт.

Кӧ тудо тугай – Владимир Высоцкий? Эн ондакше кӧ лийын: Актер? Поэт? Мурызо? Каласаш неле… Икте раш: тудо кугу мастар лийын. Тудын модмо спектакльыш билетым налаш неле лийын, ятыр фильмым Высоцкийын модмо рольжылан верчынак онченыт. А тудын мурымо мурыжо-влак кумдан чапланеныт — нуным паленыт, магнитофон кассетыш возеныт да элнан чыла луклаштыже муреныт. 

Йоча-влак Высоцкийын илышыж нерген моткоч тӱткын колыштыныт. Нунылан видеоролик-влакым ончалашат пеш оҥай лийын – тудын интервьюжо, ончышо-влак дене вашлиймашыже, спектакль да кинофильмжыла гыч ужаш-влакше… Да, мутат уке, тудын шкешотан йӱкшӧ дене мурымо баллада, лирический, юмористический муро-шамыч, а эше Кугу Отечественный сар нерген муро-влак. Тудын кумда шонымашан авторский произведенийже-влак «На Большом Каретном», «Песня о друге», «Я не люблю», «Он не вернулся из боя», «Охота на волков», «Дом хрустальный» йоча-влакым чынже денак сымыстареныт.

 

---