Кажне айдемын илышыже финанс тӱня дене кылдалтын. Нелылык ынже лек манын, финан йодышым сайын шымлыман,  окса бюджетымат шеледаш тунемман. Книгагудышто  «Мый – финансист» Ӱстел модыш кече эртен. Тушко 9-ше номеран школ пелен лагерьыште каныше йоча-влак ушненыт. Вашлиймаш оҥай веле огыл, тыгак пеш пайдале лийын.

Участник-влак икмыняр тематический станцийым эртеныт, оксан илышыште верже нерген, тудым кучылт моштымо нерген пален налыныт.  Уло кумыл дене  экономический задачым, финансовый ребусым решатленыт, доход да расход манме умылымашым лончыленыт,  потребительский корзине нерген ойленыт.

Модыш форматан мероприятий теорий дене веле огыл палдарен, тыгак финансовый эксперт семын модын ончаш йӧным ыштен.

5 июньышто Россий мучко Экологын кечыже палемдалтеш.  Цивилизацийын вияҥмыж дене таче пӱртӱсым аралыме йодыш ик эн пӱсын шога. Садлан Мландысе йыр улшо пӱртӱсым кызыт экологический кризис семын ончат.

1–6 класслам обслуживатлыше пӧлемыште  йоча-влаклан «Пӱртӱсым йӧратыме уро» книжно-иллюстративный ончер-темлымашым чумырымо.

9 майыште мемнан элна Кугу Отечественный сарысе Сеҥымашлан 80 ий теммым палемдыш. Тиде лӱмгечылан книгагудышто «Кугу Сеҥымашын кышаже» Республиканский усталык паша конкурс эртен. Республикысе самырык сӱретче-влак 7 гыч 14 ияш марте лийыныт. Конкурс кок номинаций дене эртен: «Рисунок» да «Произведение декоративно-прикладного творчества».  93 паша гыч жюри  24 эн сай пашам ойырен.

1 июньышто, Йочам аралыме тӱнямбал кечын, конференц-залыште Йошкар-Ола да районла гыч самырык сӱретче, нунын ава-ачашт, туныктышо-шамычышт погыненыт. Кажне   призёр диплом ден шарнымаш пӧлекым налын.

Саламлымашым сеҥыше-влакын пайремже семын веле огыл, тыгак Кугу Отечественный сарыште кредалше талешке-влакым, тылыште тыршыше-шамычым пагален шарныме семын аклыман.

Саламлена сеҥыше-влакым!

Тыланена у деч у кӱкшытым!

22 июнь –  Шарнымаш да ойго кече. Тиде кечын 84 ий ончыч 200 млн наре еҥын илышыже пӱтынек вашталтын — Кугу  Отечественный сар тӱҥалын.

Тиде кечын элна мучко кугыжаныш флагым волтат, а тӱвыра тӧнежлаште, телевидений ден радиошто развлекательный мероприятий ден передача-влакым кораҥдат.

Шарнымаш да ойго кечын ик эн тӱҥ тематический проектлан  «Шарнымаш сорта» Всероссийский онлайн-акцийым шотлыман. Тений тудо  10 гыч 22 июнь марте эрта.
Тиде Акцийыш ушнаш манын,   деньпамяти.рф адрес дене эртыман, сайтын тӱҥ  страницыштыже «Зажечь свечу памяти» кнопкым темдалман.

Кумылан-влакым Акцийыш ушнаш ӱжына, ветеран-влаклан полыш кумылнам ончыктена.

 9 майыште Россий Кугу Отечественный сарыште сеҥымылан 80 ияш лӱмгечым палемдаш тӱҥалеш.  Тиде кече ятыр миллион еҥын чоныштыжо икоян улмо шижмашым, патырлыкын, лӱддымылыкын символжо семын кодеш. Кугыеҥланат, икшывыланат тиде кече уэш ушештара, могай ак дене толын тиде пайрем.

Сеҥымаш Кече вашеш книгагудышто «Могай сай тӱняште сар дечын посна!» Х-шо Республиканский лудмо конкурс эртен.

Конкурсышто шым ийым темыше 74 йоча таҥасен. Нуно Муса Джалильын, Константин Симоновын, Александр Твардовскийын, Степан Кадашниковын да моло уста авторын почеламутыштым лудыныт.

Ӱдыр-рвезе-влакын лудмышытым жюри аклен. Тиде — СВО ветеран-влакын оласе пӧлкажым вуйлатыше Дмитрий Юрьевич Дубников; поэт, Россий писатель ушем еҥ  Алексей Анатольевич Веселов; поэт, Т. Евсеев лӱмеш Калыкле тоштерысе шанче книгудым вуйлатыше, Олык Ипай лӱмеш премийын лауреатше Андрей Владимирович Шурыгин, Республикысе курчак театрын актрисыже, Йыван Кырла лӱмеш премийын лауреатше, «ФорКидс» театр искусство, журналистика да кино рӱдерын директоржо Ирина Александровна Казакова-Мартынцева; Кутузов орденан 14-ше ракетный Киевско-Житомирский дивизийын узел связь вуйлатыше, майор  Евгений Эдуардович Пикюк;  узел связьын механикше, Кутузов орденан 14-ше ракетный Киевско-Житомирский дивизийын ефрейторжо Татьяна Иннокентьевна Иванова; поэт, Марий Эл Республикысе Кугыжаныш премийын лауреатше  Надежда Геннадьевна Никитина; «Наше время» йоча организацийым вуйлатыше Лариса Анатольевна Бобик.

Валентин Христофорович Колумбын шочмыжлан 3 майыште 90 ий темын. Тудын лӱмжым мемнан книгагудына кугешнен нумалеш.

Валентин Колумб — уста марий поэт, писатель, кусарыше, журналист. Марий комсомолын Олык Ипай лӱмеш  сылнымут премийын икымше лауреатше (1968). Тудо кӱчык ӱмырым илен, мланде ӱмбалсе пашам пуйто чыла ыштен шукташ шонен. Тудын творчествыж деч посна таче россий поэзий, поснак марий сылнымут, нерген ойлаш неле.

 «Валентин Колумб» Интерактивный плакат  Валентин Христофоровичын илышыж да усталык пашажым  лончыла да марий сылнымут нерген шинчымашым келгемдаш полша.

2025 ийыште ме Кугу Отечественный сарыште Сеҥымашлан 80 ийым пайремлаш тӱҥалына. Тиде кече калыкын патырлыкшым, пеҥгыдылыкшым да икоян улмыжым ончыктышо семын курым мучко шӱмыштына лиеш. Жап эрта, сарым шке шинчаж дене ужшо еҥ шагалрак да шагалрак кодеш. Но шарнымаш эре ила. Историй шарнымашым арален кодымо, Кызытсе йоча-влаклан Кугу Отечественный сарысе геройло событийлам шарнаш, кугезе коча-кован подвигше дене кугешнаш  сар нерген лудмо конкурс полша.

Сеҥымаш кече вашеш ынде луымшо гана книгагудышто  «Могай сай тӱняште сар дечын посна!» X-шо Республиканский лудмо конкурс эрта. Кажне лудмо корно тукым кылым ышташ полшышо йӧн.