Финн-угор калык-влак тӱшка Европо кумдыкышто улшо этнойылме-влак тӱшка коклаште ик эн кугулан шотлалтеш. Тиде тӱшкаш 24 тӱрлӧ калык пура, тушеч 17 тӱрлӧ калыкше Российыште  ила. Чылаже 25 миллион калык  финн-угор тӱшкаш пура. Нине калык-влакын тӱвырашт моткочак поян да шкешотан. Кушко кая мемнан вожна? Могайрак вий наҥгая мемнам пагытла гоч? Кӧ да кушеч ме улына?  Карел ден вепс, коми ден удмурт, мордва ден мари, хант ден манси… Нине да моло калык-влак  нерген Калыкле президентский школын 5-ше классыштыже тунемше-влак этнографический шагатыште пален налыныт. 

Йоча-влак калыкле герб, йылме, тӱвыра да пайрем-шамыч нерген палыме лийыныт, финн-угор калык-влак кушто верланеныт, ожно кушто да кузе иленыт — рашемденыт. Адакше тидат онай: ожно эше муром, мерян, мещер, кеми-саам да аккала йылме-влак лийыныт. А теве водь йылме дене кызыт улыжат 30 наре еҥ мутлана.
Шымлызе ден йылмызе-влакын шонымышт почеш, финн-угор кугезе калык ончыч ик верыште илен, ик йӱлам кучен, ик йылме дене ойлен. Кызыт нуно тӱрлӧ вере шаланен пытеныт гынат, шке вожыштым огыт мондо, ваш кылым ыштен илат. Тидланже тӱрлӧ программе-влак илышыш шыҥдаралтыт.

2019 ий мемнан республиклан поснак ойыртемалтше — Морко районысо Шоруньжа села финн-угор тӱнян культур рӱдолаже лийын. Тений тушто ятыр мероприятий эртаралташ тӱҥалеш, тыгак тушко шуко унам вучат.

---