8 сентябрьыште Тӱнямбал грамотлык кече палемдалтеш. Тыгай пайрем икымше гана 1966 ийыште ЮНЕСКО-н темлымыж почеш палемдалтын. Тудын тӱҥ шонымашыже — кызытсе саманыште тӱнямбалне грамотлык деке тӱткышым утларак ойырымаш.

Грамотлык айдемын кӱкшӧ уш-акылан улмыж нерген ойла. А тидланже правилым тунемман, уш-акылым вияҥдыман, сайын тунемман. Кызыт тӱнямбалне 800 миллион наре еҥ лудын-возен ок мошто. Тачысе кече мемнан деч шуко шинчымашым йодеш, а шинчымашым чын ончыктен мошташ лач сай грамотлык кӱлеш, поснак кушкын толшо тукымлан.

Краеведений да периодике пӧлкаште «Шинчымаш кече деч — Лудмаш да грамотлык кече дек» лӱман книга ончер пашам ышта. Тушто руш йылме дене тӱрлӧ мутер ден справочник-влакым, тыгак вес йылмыласе ой-влакым чумырымо мутерым муаш лиеш. Тест полшымо дене лудшо-влак шкеныштын мутвундо поянлыкыштым терген кертыт.

Тиде кече мыланна шоналташ амалым пуа: мом ме ойлена, кузе ме ойлена. Тидыже поснак самырык тукымлан кӱлешан. Вет самырык-влак социальный сетьлаште жапым утларак эртарат. А тидыже мутвундым пойдараш, вашла чын кутырен мошташ кугу чаракым ышта.

Айста йӧраташ шкенан йылмынам. Тидланже Лудмаш да грамотлык кечат сай амалым ышта.

---