28 апрельыште книгагудышто «Колумб лудмаш » регион кокласе  I-ше научно–практический конференций эртен.  Конференцийышке  кумдан палыме шанчызе, поэт да  журналист-влак, туныктымо тӧнежлаште тыршыше преподаватель-шамыч, книгагудо пашаеҥ, студент да В.Колумбын творчествыжым пагалыше чыла кумылан-влак погыненыт.

Вашлиймашым  Марий Эл Республикысе тӱвыра, печать да калыкле паша шотышто министрын алмаштышыже А. М. Одинцов почо. Тудо поэт-новатор, талантан кусарыше да литератур критик В.Х.Колумбын марий сылнымутышто кӱкшӧ вержым эше ик гана палемден кодыш.

1988 ийыште Республикысе самырык-влакын книгагудыжлан В.Колумбын лӱмжым пуымо. Тушто кажне ийын Колумб лудмаш эртен. В.Х.Колумб лӱмеш Республикысе йоча да самырык-влаклан книгагудышто, тиде традицийым умбакыже шуэн, регион кокласе  научно-практический конференцийым погаш палемдыме. Конференцийын тӱҥ шонымашыже –  марий поэт Валентин Колумбын илышыж да творчествыж нерген кушкын толшо тукымлан утларак каласкалаш, тудым умбакыжат тунемын да шымлен шогаш. Тыге шочмо сылнымут деке мелын лияш манме шонымаш дене тиде погынымашым эртарыме.

Конференцийын участникше-влак ятыр пайдале йодышым тарватеныт: В.Колумбын поэтике ойыртемже, кызыт тунемме т ӧнежлаште тудым кузерак туныктымо йодыш, книгагудылаште проект паша-влак кузерак вияҥыт да т. м.

Марий поэзийыште кыртмен тыршыше поэт да кусарыше Г. Пироговын ойлымыжым колыштшо-влак кӱкшын акленыт. Шке докладыштыже тудо поэтын гражданский позицийжым, тудын философий келгытшым, кусарыме паша кӱкшытшым, В.Колумбын кугу профессионал улмыжым сайын почын пуэн.  Моло участник-влакынат докладышт кӱлешан лийыныт.

Уна-влак палемденыт: йоча ден самырык-влакым куштымаште  В. Колумбын произведенийжым лудмашат изи огыл верым налшаш.

---