Кажне профессийын шке профессиональный пайремже уло. Фантаст-влак тудым 31 июньышто палемдат.

Гарри Поттерын порылык ден осалын ваш шогымо, мыланна шагал палыме тӱняже кеч-могай ийготан йочаланат оҥай. Уло мо тӱняште айдеме, кудыжо Гарри Поттер нерген колын огыл? Кумдан палыме самырык рвезым тӱрлӧ элла гыч йоча-влак сайын палат.

9-ше номеран кыдалаш школ пелен йоча каныме лагерь гыч икшыве-влакат тудым сайын палат. Нунылан «Пагален ӱжына Хогварсыш!» ӧрыктарыше калейдоскопым ончыктымо. Тунемше-влак уло кумыл дене юзо тӱняшке «миен коштыныт», Хогвартсын историйже дене палыме лийыныт.

Йоча-влак шкештат жаплан изи юзо лийыныт: тӱрлӧ йӧрым пырля луген, оҥай опытым ыштылыныт. Произведенийым сайын палыше, 7 книгам чын шындылше йоча-влак  Гарри Поттер дене кылдалтше викторинымат сай решатленыт. А эше Великобританийыште 2012 ийыште почылтшо виртуальный тоштер дене палыме лийыныт.  Ӧрыктарыше калейдоскоп моткоч оҥай лийын, эсогыл фантастикым йӧратыдыме йочажат Гарри Поттер нерген книга-влакым лудаш кумылым ончыктен.

---