Ю татын ош тӱняшке толын,

Тӱнян куанымыжым кольым.

Пӱртӱсын лоҥыштыжо шолын,

Тыршен модам мый шкемын рольым.

                                         

Республикысе йоча да самырык-влаклан В.Х.Колумб лӱмеш книгагудо сылнымутым йӧратыше-влакым самырык поэтессе Надежда Васильева-Эмыкан дене вашлиймашыш чумырен. Надеждам 2015 — 2016 ийлан Марий Эл Республикын литературышто, культурышто да искусствышто  Олык Ипай лӱмеш Кугыжаныш премийлан темлыме.

Надежда Эмыкан шукерте огыл савыкталтше «Мый шошын ӱдыржӧулам» лӱман почеламут ойпогыжым Олык Ипай лӱмеш премийым пуымо шотышто комиссий ончык аклаш луктын. Вашлиймашыш толшо уна-влак ончылно авторын почеламутшо-влакым Шкетан лӱмеш драме театрын уста артистше-влак М.Воронцова, Н.Алексеева да А.Яруков сылнын лудыныт. Надеждан мутшылан возымо муро-шамыч дене мурызо-влак Т.Денисова, Н.Пашкина, А.Яковлева да С.Устюгов пайрем кумылым эшеат кӱшкырак нӧлтышт.

Ныжылге кумылан, поэзий тӱняште шке ойыртемалтше йӱкшӧ дене йоҥгышо Надежда Васильева-Эмыкан  ̶  икмыняр книган авторжо. Тудо студент жапыштыже «Поэзий шепкаште» сылнымут кружокыш кумылын коштын. Лач тунам Надежда поэзийыш у шӱлыш дене толын.

2007 ийыште «Ида шылтале мыйым» книгам савыктен. А 2014 ийыште Финн-угор родо-тукым кыл программе почеш Эстонийыште ныл йылме дене «Кастене лыве лиям» поэзий сборникше лектын.

2016 ийын самырык поэт марла да пеленже руш йылмыш кусарыме «Мый шошын ӱдыржӧ улам» сылныму аршашым лудшо-влаклан пӧлеклен. Н.Эмыканын сылнымут садвечышкыже тудын родо-тукымжо, йолташыже, Марий кугыжаныш университетын студентше ден туныктышыжо-влак погыненыт. Нуно пайрем озалан шуко поро шомакым ойленыт. Тудын талантшым аклен, ятыр пеледыш аршашым кучыктеныт.

Ме Надеждалан сеҥымашым да у кӱкшытым тыланена!

---