Кажне калыкын тукым гыч тукымыш куснышо да мондалтдыме талешкышт уло. Нунын подвигышт эрелан калык шӱмышто кодеш…  Князь Александр Невскийын лӱмжӧ   мемнан элнан историйыштыже посна верым айла.  Тудо чынже денак Кугу полководец, кудыжо илышыштыже ик кредалмашыштат сеҥалтын огыл.

18 апрельыште мемнан элыште  Российысе сарзе чап кече  —  Князь Александр Невскийын руш войскажын Чудской ер ӱмбалне немыч рыцарьым сеҥыме кече палемдалтын. Тиде пайрем вашеш Аграрный колледжын 1-ше курсышто тунемше-влаклан  « Александр Невскийын сар подвигше-влак» просветительский шагат эртен. Тудо князьын шочмыжлан 800 ий теммылан пӧлеклалтын.

Тунемше-влак пуйто акрет годсо пагытыш пӧртылыныт. Кажне руш айдемылан Александр Невскийын лӱмжӧ талешке, руш мландым аралыше семын палыме. Тудо лӱддымӧ, ушан, мунло, кумда чонан лийын. Йоча-шамыч тудын илыш корныжо, подвигше-влак нерген пален налыныт. Невсий нерген произведений, живопись, киноискусство дене палыме лийыныт. Тудын пӱтынь илышыже — шочмо мланде, шочмо калык деке йӧратымаш — пример шотеш кодеш.

 

---