Авай мала, ноен дыр тудо…

Да мыят ынде ом мод! 

Модыш пире шыпланен, 

Воктенем шинча нерен. 

 

Елена Благининан кумдан палыме «Тымыкыште шинчена» («Посидим в тишине») почеламутшо гыч нине корно-влак кажнылан йоча годсек палыме. Яндар да йоҥгалтше йӱк дене изи героиня аваж деке йӧратымашыж нерген ойла… Тудо аважым йӧрата веле огыл, эше моткочак чамана.

Йоча поэтесса Елена Благининан шочмыжлан 115 ий темме вашеш «Палыме лаштык-влакын кышашт дене» сылнымутан вашлиймаш эртен. «Росток»  рӱдерын икшывыже-влак йӧратыме авторыштын почеламутшо-влакым лудыныт да каҥашеныт. Кажне йочан йодыш-влаклан вашмутым пуымыжо шуын: мо тугае келшымаш, икте-весылан полшыман мо, чаҥга лияш сай мо да тулеч молат. Чын вашмутым Е.Благинина шке произведенийже-влак гоч куштылгын пуэн. Тудын почеламутшо-влак проста йылме дене возым улыт да йоча кумылым савырен моштат.

Весела Незнайка, пайремыш толынат, шке возымо почеламутшо-влакым лудаш тӱҥалын, но нунышт иктыланат келшен огытыл. Тудо йоча-влакым мыскылаш шонен пыштен, да возымыжат нимолан йӧрдымыш савырнен. Тунам Незнайка Елена Благининан почеламутшо-шамычым колышташ тӱҥалын, вет автор моткоч весела мурым, йомакым, шотлеммутым возкален.

Те Елена Благининан творчествыж дене палыме огыдал гын, книгагудыш вашкыза! Тудын возымо почеламутшо-влак «Журавушка», «Улетают-улетели», «Гори-гори ясно!» сборниклашке пуреныт. Лудса мемнан дене пырля!

 

---