Книгагудышто марий поэтессе, Олык Ипай лӱмеш премийын лауреатше, Марий Эл Республикысе сымыктышын сулло пашаеҥже Альбертина Петровна Иванова (Аптуллина) дене усталык вашлиймаш эртен. Тушко тудын шочмо кундемысе Куженер район  Юледур кыдалаш школын туныктышо ден тунемше-влак, И.С. Палантай лӱмеш калыкле тӱвыра да сымыктыш гимназий гыч студент ден тунемше-шамыч, «Чонволгалтыш» сылнымут клубын еҥышт да поэзийым пагалыше-влак погыненыт. Кок шагат наре шуйнышо пайрем сынан вашлиймаш шижде эртыш. Альбертина Петровнан поэзий тӱня  нерген оҥайын да чон пыштен  каласкалымыже кажне айдемым сылнылыкым лишкырак умылаш кумылаҥда.  

Альбертина Иванова шуко шӧрынан шке илышыж нерген ойлен. Тудо Самырык писатель-влакын VI-ше Всесоюзный совещанийыште, иза-шольо республик кокласе поэзий фестивальыште, икмынар гана финно-угор писатель-влакын Международный конгрессыштышт да ятыр моло вереат лийын. Ятыр книган авторжо кусарыше семынат шуко пашам савыктен.  Руш, немыч, англичан, финн, эстон, туркмен,чуваш, удмурт, татар йылмыла гыч кусарыме  почеламут-влак посна книга дене лектыныт. Чыла тидыжым книга ончерыште ужаш лийын.

Вашлиймаш годым тунемше ден студент-шамыч А. Иванован почеламутшо-влакым йоҥгалтарышт, йодыш-влакымат пуэдышт. Самырык тукымлан палаш оҥай ыле, кузе почеламут шочеш, кунам возалтын икымше почеламут, мо тарата возаш?

Альбертина Иванован почеламутшылан шуко мурым возымо. Марий Эл Республикын сулло артисткыже Татьяна Денисова ден М. Шкетан лӱмеш драме театрын актержо кумдан палыме муро-влакым уло кумылын муралтышт.

Шукерте огыл Альбертина Петровна шке лӱмгечыжым палемден. Книгагудо да лудшо-влак лӱм дене ме тудым шокшын саламлена, пеҥгыде тазалыкым, ончыклыклан сай ӱшаным, у паша саскам тыланена!

Кӧ автор дене вашлиймашыш толын кертын огыл гын, «Культура.рф» платформышто вияш трансляцийым ончен кертын. Тиде йӧн элна мучко марий сылнымутналан йоҥгалташыже полшен.  (Трансляцийым  ссылке почеш ончаш лиеш.)

---