«Валентин Колумбым лудына» республиканский акций негызеш 3 майыште книгагудышто кумдан палыме марий поэт-новаторын шочмо кечыжлан пӧлеклалтше мероприятий эртен. «Колумб: илышын татше-влак» виртуальный фотоальбом дене  Калыкле  президентский школын 6″Б» классыште тунемшыже-влак палыме лийыныт. 

Поэт моткочак кӱчык, но тӱвыргӧ илышым илен эртарен. Но кӱчык ӱмырыштыжӧ марий каваште муро кӱкшытым писын налын.

 

Пашаште, кунам от васартыл,

Уке кӱкшытлан мучаш,

А уло эн кӱкшӧ мастарлык

Эре чоҥешташ, чоҥешташ!

 Олык Ипай лӱмеш премийын икымше лауреатше Валентин Христофорович Колумб (1935-1974)  марий литературым вияҥдымашым пеш кугу пашам ыштен коден. Шуко нациян Российысе поэзийым Колумбын творчествыж деч посна аклаш йӧсӧ.

Лудшо-влаклан темлыме виртуальный фотоальбомыш поэтын йоча жапысе, студент годсо, паша да ешыж дене лийме пагытыште войзымо фотосӱрет-влакым чумырымо. В.Колумб редактор, литератур критик, кусарыше семынат моткоч шуко тыршен.  Тудын возымо почеламутшо-влакым Калыкле президентский школышто тунемше-шамыч уло кумылын лудыныт.

---