27 апрельыште  37 номеран йочасадын икшывыже-влак йоча писатель Г.Х.Андерсенын йомак тӱняшкыже миен коштыныт,  «Принцесса на горошине» йомакшым колыштыныт. Ӱдыр-рвезе-шамыч уло кумылын Андерсенын илыш-корныж нерген пален налыныт. Тудын возымыжо почеламут семын куштылгын лудалтеш. Южо йомакше ойган кумыл дене тӱҥалыт да тыгак мучашлалтыт. А кӱшнӧ каласыме йомак — пиалан мучашан.

Йомакын тӱҥ героиньыже — принцессе, каласыман, чын принцессе. Чын улмыжым  йоча-влак кузе паленыт? Тиде йодышлан вашешташ манын, йоча-влаклан раскраскым сӧрастараш кӱлын: мутлан, тӧшакым чиялташ, пурса пырчым кӱлеш верыш пижыкташ да т.м. Икшыве-влак чылажымат сай ыштеныт, вет йомакым пеш тӱткын колыштыныт. Йомак  изи айдемын уш-акылжым пӱсемдаш, илышыште йӧным кучылт мошташ, шонымашыш шуаш туныкта.

 

---