ХХ курымын кокымшо пелыштыже айдеме тукым Сандалыкын лондемышкыже тошкалын. Тушко корным мемнан элна почын: Мландын икымше искусственный спутникшым Совет Союзышто колтымо, тӱнямбалсе икымше космонавт — СССР-ын гражданинже Юрий Алексеевич Гагарин.

Космонавтикын кечыж вашеш, 11 апрельыште,  Торгово-технологический колледжын студентше ден Национальный президентский  школ-интернатын тунемшышт-влаклан книгагудышто «Тудо сандалык курымым почын» лӱман  Гагарин урок лийын.

Тунемше-влак икымше космонавтын илышыж нерген пален налыныт, сандалык техникын вияҥмыже, корабль ден станцийласе шымлымаш паша-шамыч нерген палыме лийыныт. Документальный да научно-популярный фильмласе фрагмент-влакын полшымышт дене мероприятийын  участникше-шамыч космосыш чоҥешташ ямдылалтме этапым, тыгак Ю.Гагаринын бортышто улмыжым ужын кертыныт. Сандалыкыш чоҥештымаш — ончыко лӱдде кайыше еҥын поступокшо.

Книгагудышто Космонавтика кечылан пӧлеклалтше вес мероприятият лийын: икымше ӱдырамаш-космонавт В.Терешкован шочмыжлан 80 ий темме вашеш слайд-досьем ямдылыме.

---