«Лудаш, тӱням сайракым ышташ манын!» лӱман Йоча книга арням республикысе писатель-влак Екатерина Михайловна Клюжева да Сергей Евгеньевич Шелепов дене вашлиймаш почо. Тудо «Йомак почеш йомак» маналтын.

Екатерина Клюжева – сылнымутыш шукерте огыл толшо автор, тудын шкешотан тӱняончалтышыже оҥай, талантшат кугу. Вашлиймашыште тудо шкенжын «Еще чашечку»икымше книгажым презентоватлен. Тушко ойлымаш-влакым пуртен. Сергей Евгеньевич Шелепов — «Золотое перо Руси» Национальный сылнымут премийын лауреатше  — самырык лудшо-влакым шкенжын «Баушкины сказки» книгаж дене палымым ыштен. Кок авторымат йоча-влаклан возымо кугу кумыл ушен шога.

Вашлиймашыш  Национальный президентский школ-интернатын тунемшыже-влак толыныт. Возышо еҥ дене палыме лийын, шинчаваш мутланаш, йодыш-шамычым пуэдаш — йоча-влаклан кугу куан. Ӧрын шогыде, нуно уна-влаклан вигак йодышым пуэныт: «Кузе те возаш тӱҥалында?» Автор-влакын вашмутышт икшыве-влаклан вучыдымо лийын: нунын кокла гыч иктыжат ончыкылыкым сылнымут дене кылдаш шонен огытыл улмаш.

Жап шижде эртен, а йодыш-влак пытыдыме лийыныт. Мероприятийын участникше-влак вес вашлиймашым шке школыштышт ышташ палемденыт.

.

---