Самырык герой-антифашистын кечыж лӱмеш книгагудышто йӱкын лудмаш лийын. 76-шо номеран йочасадын икшывыже-влак Л.Кассильын «Тишка рвезе да немыч отряд» лӱман ойлымашыжым колыштыныт. Самырык партизан тушман-влакым купышко ондален конден кертмыж дене геройло поступкым ыштен. Шке илышым чаманыде, лишыл еҥ-влакым арален кодаш — тиде кугу подвиг, осал ваштареш лӱдде шогымаш. Тыгай шонымашымак шыҥдарен автор шке произведенийыштыже. Тачысе йоча-шамычланат тудо шонаш таратыше лийын кодеш. 

Кугу Отечественный сар ийлаште йоча-влак кугыеҥ дене тӧр тушман ваштареш кредалыныт. Тӱжем дене ӱдыр-рвезе шочмо эл на верч шке самырык ӱмыржым пуэн. Шукыштын лӱмыштат пале огыл, но подвигышт ӱмырашлык.

Сар нерген, айдемын пӱрымашыж нерген лудын- шонкален, йоча-влак шочмо мландым йӧраташ тунемыт, историйым палаш кумылаҥыт.

---