19 январьыште книгагудыштына «Литературные параллели: от творческого наследия Толкина к научно-познавательной литературе» лӱман интерактивный викторине лийын. Тудо англичан писатель, поэт, сӱретче, профессор, сылнымут доктор, лингвист Джон Рональд Руэл Толкинын шочмыжлан 125 ий темме лӱмеш эртаралтын. Мероприятийыште Йошкар-Оласе 9-ше номеран школын 8-ше классыште тунемшыже-влак лийыныт.

Тиде писательын  фэнтези жанран книгаже-влакым тӱнямбалсе уло калык кумылын лудеш. Авторын сылнымутшо — ятыр тӱжем ийла дене вияҥше историйым, географийым, калык-влакым, тӱвырам, кугыжаныш да йылме-шамычым ушышо кумда тӱня. Шонен лукмо тӱням сӱретлаш манын, Джон Рональд Толкин тӱҥжылан чын илышым налын. Шонен лукмо икмыняр настажым вик умылаш лиеш гын, весе-влак, мӧҥгешла, йомак але мифологий сыным налыт. Фэнтези тӱняште мо лийын кертмым але лийын кертдымым пырля шонкален-кычалаш манын, тунемше-влак деке поэт, РФ писатель ушем член Е.Ф. Хисамутдинова толын. Тудо йоча годсекак ты писательын творчествыжым шымлен шоген,  произведенийже-шамычым пеш сай пала.

Йоча-влак англичан писательын илыш-корныж гыч икмыняр оҥай фактым, тудын йылме поянлыкшым лишкырак пален налыныт. Ӧрыктарыше «Сильмариллион» книгаже —  Джон Рональд Толкинын тӱняжым почшо сравочшо манаш лиеш.

Оҥай вашмутланымаш мучаште ӱдыр-рвезе-влак «Литературные параллели» лӱман викториныште шке шинчымашыштым тергеныт.

---