Ужар чодыра ден Элнет серыштет

Ужар сывынла леведалтын шогет.

Мотор, йӧраталме Марий кундемна,

Ме тыйым моктен мурена.

С.Вишневский

 

Кажне ийын, 4 ноябрьыште, ме Марий Эл Республикын шочмо кечыжым пайремлена. Тидланак пӧлеклалтын  В.Х.Колумб лӱмеш Республикысе йоча да самырык-влаклан книгагудышто эртыше почеламутым лудмо оласе конкурс.Марий поэт-влакын шочмо кундем нерген почеламутыштым лудаш Йошкар-Оласе школ, профессиональный училище, колледжла гыч тунемше-влак погыненыт. А эн изи лудшо (4 ияш) «Хрусталик» йочасад гыч толын.

Почеламутым сылнын лудмаш — тиде шкешотан искусстве. Кажне мутым чон вошт колтен, произведенийын кӧргӧ шонымашыжым почын ончыкташ мастарлык кӱлеш. Пайрем жапыште тидыже поснак шижалте. Йоча-влакын сылнын лудаш тыршымышт раш койо. Поэзий пайремым сӧрастараш Национальный президентский школ гыч З.И.Васютинан вуйлатыме «Кӱсле» ансамбльже толын.

Конкурсышто  изирак, кыдалаш да кугурак  ийготан йоча-влак вийыштым тергеныт. Нунын пашаштым профессиональный жюри аклен: поэтессе А.Иавнова, Шкетан лӱмеш Марий национальный драме театрын артисткыже С.Филиппова, журналист-влак Э.Терентьева ден Л.Григорьева, книгагудын справочно-библиографический пӧлкажым вуйлатыше Л.Дроздовская. Жюрилан эн сайын лудшо-шамычым ойыраш неле ыле. Теве сеҥыше-влакын лӱмышт: Прокопьев Илья (7 шк., 3 Д класс), Борисова Ирина (Национальный президентский школ-интернат, 6 А класс), Пакеева Снежана (Торгово-технологический колледж, 1 курс). Нунылан Почётан грамотым да пӧлекым кучыктымо. Тыгак конкурсын кажне участникше Сертификат дене палемдалтын.

Книгагудо эн изи участник Конаков Григорийлан (5-ше номеран «Хрусталик» йочасад), Краснова Кристиналан (13 шк., 5 А класс), Ялтаев Даниллан (29 шк.,9 Б класс) шкешотан призым пуэн: театрышке ӱжмашан билетым кучыктен.

 Лудмаш конкурсым эртараш полшымыштлан туныктышо, воспитатель, ача-ава-влаклан тау мутым ойлена.

Чылалан у сеҥымашым тыланена!

---