Мемнан книгагудышто уста землякна-влак дене вашлиймашым эртарымаш сай традицийыш пурен. Шукерте огыл тыгай пайрем марий поэт, МАССР-ын сулло туныктышыжо  Зинаида Васильевна Ермакова дене лийын. Вашлиймашыш Марий кугыжаныш университетын студентышт, И.С. Палантай лӱмеш тӱвыра да сымыктыш колледж пеленсе сымыктыш национальный гимназийын тунемшышт толыныт.  Амалжат пе сай — 28 сентябрьыште З.Ермаковалан 75 ий темын.  

Зинаида Ермакова — «Садеран рвезылык», «Садеран корнывожышто», «Телын саламже», «Чоя Марусь», «Тек куржыт ий-влак» поэтический книга-влакын авторжо.  Уста туныктышо школышто ыштымыж годым  талантан ятыр ӱдыр-рвезе-влакым илыш-корныш луктын. Таче нуно республикыштына кумдан палыме писатель, поэт, журналист, йылмызе улыт.

Вашлиймаш поро шӱлыш дене эртен. Шерге уна шке почеламутшо-влакым чон гыч луктын лудмыж ден толшо-влакым куанаш да ойгыраш таратен. Тунемше-влакат авторын поэзийжым йоҥгалтареныт. Ийготым ончыде, Зинаида Васильевна тачат пеш чулым да илышым йӧратыше. Тудо уста колызо да поҥгызо. Автор шке творческий планже денат мемнам палымым ыштыш.

Шке туныктышыжым саламлаш филологий наука кандидат В.Н.Максимов толын ыле. З.Ермакован пашажым  филологий наука кандидат, доцент Г.Н.Бояриноваят кӱкшын аклыш.

Ме уло кумылын Зинаида Васильевнам юбилейже дене шокшын саламлена, пеҥгыде тазалыкым, у паша кӱкшытым тыланена!

---