Йоча писатель, ятыр исторический романын  авторжо Любовь Федоровна Воронкован шочмыжлан 115 ий темеш. Тиде лӱмгече вашеш мемнан книгагудышто «Ола гыч ӱдыр» сылнымут шагат лийын. Тушко 9-ше номеран школын кудымшо классыште тунемшышт-влак погыненыт ыле. Йоча-шамыч писательын илышыж нерген веле огыл, тыгак тудын кумдан палыме книгаж шотыштат мутланеныт.

Любовь Федоровна чыла ийготан йоча-влаклан книгагудым поген. Нунын коклаште «Ола гыч ӱдыр» («Девочка из города») повестьше посна верым налеш. Тудо Кугу Отечественный сар жапыште тулыкеш кодшо ӱдыр да тудым ашнаш налше поро еҥ-влак нерген каласкалалтеш. Авторлан повестьым возаш илыш шкежак кӱштен улмаш. Йочалан возымо книгам кугыеҥ-влакат йӧратен лудыт. Адакше тиде повесть мемнан дене веле огыл, вес эллаштат кумдан чапланен. Икшыве-влак сар, ава-ача деч посна эртыше йоча пагыт, аван йӧратымашыж нерген мутланеныт. Тӱҥ герой Валентинкан ойгыжым йоча-шамыч чон воштак колтеныт.

 Тиде книгам теат луднеда гын, тендам книгагудышто вучена!

 

 

 

 

---