«Шерге ава да виян ача-влаклан» концерт иканаште кок пайремлан — 23 февраль да 8 мартлан – пӧлеклалтын. 

Сцене гыч сылне да ныжыл сем-влакым И.С. Палантай лӱмеш тӱвыра да сымыктыш колледжын, тыгак Йоча сымыктыш школын тунемшышт-влак моткоч устан йоҥгалтарышт.

Чонышто улшо мотор шомак-влак эн шерге еҥна-влаклан — ава-ачалан, кова-кочалан — пӧлеклалтыч.

Пайрем уна-влакын ныжыл йӱкышт чынжымак кумылым савырышт. «Allegria» вокал ансамбль да самырык вокалистка Елизавета Шишкинан мурыжо-влак, сылне йӱкан Артем Шубенковын йоҥгалтарыме кумдан палыме «Besame mucho» романсше кажныжым куандарен. Тыгак домрым, фортепианым, баяным, гитарым флейтым йоча-влак устан шоктеныт.

Залыште пайрем кумыл озаланен. Ончышо ден колыштшо-влакын шокшо кидсовышышт лач тидын нергенак ойленыт.

---