Ик кугыжанышыште, ик элыште иленыт мастар-влак. Нуно мотор вургемым, модышым, атышӧрым ыштен сӧрастареныт. Тыге йыр улшо калыкым ӧрыктареныт. 29-ше номеран школын 5 классыште тунемшыже-влак «Иленыт улмаш мастар-влак» видеовернисажым уло кумылын онченыт.   Мультимедийный презентаций полшымо дене йоча-влак уста кидмастар-шамычын пашашт дене палыме лийын кертыныт. Богородскысо пу модыш, гжель керамик гыч йомак пеледыш, хохломан шӧртньӧ орлаҥгыже — чыла тиде мотор чиян палитрыш савырна. Мастар-влакын ончерыште улшо сӧрал пашаштым ончен, тунемше-влак тӱрлӧ элемент-влакым таҥастареныт. Нуно иктешленыт: южо предмет-влак, кудыжым ме илышыште кучылтына, сӧрастарыме деч поснат сӧрал улыт. Но моторлык кумылым нӧлта, илыш куаным пӧлекла. Вашлиймашым шарнаш манын, йоча-влак дымковский барыне-влакын фигурыштым  ыштен наҥгаеныт.

---