«Кажне айдемын шке шӱдыржӧ».

Антуан де Сент-Экзюпери

Антуан Мари Жан-Батист Роже виконт де Сент-Экзюпери (1900-1944) — француз писатель, поэт, кум сылнымут премий ден палемдалтше да профессиональный лётчик. Тудо чынжымак романтик да пеш поро айдеме лийын. Еҥ-влак икте-весыштым колышт моштышт, шке шӱмыштлан ӱшанышт, йоча годсо пагыт денат вашке ынышт чеверласе манын шонен. Лач тидын нерген Антуан де Сент-Экзюпери  «Маленький принц» книгам возен. Кокымшо тӱнямбал сарышкат  тудо  пуйто вес планетылашке Изи принц семын каен  – вет раш умылен, мӧҥгеш корно ок лий… Майор де Сент-Экзюперин пытартыш гана чоҥештымашыже 1944 ийыште кӱрылтын. Камвочшо самолетын ужашыже-влакым мумо огыл. Садланак мотор легенде шочын: пуйто писатель-летчик кандале сандалыкыш шӱдыр-влак деке каен, лач тудын Изи принцше семынак. Кугурак класслаште тунемше да студент-влаклан залыште те  «Порылык планета гыч айдеме» книжно-иллюстративный ончерым ужын кертыда. Тудо Антуана де Сент-Экзюперин 120 ияш лӱмгечыжлан пӧлеклалтын. Авторын «Планета людей», «Ночной полет», «Южный почтовый», «Маленький принц» да «Цитадель» книгалажым лудаш темлена. Тыгак Стейси Шиффын «Сент-Экзюпери. Биография» ден Марсель Мижон «Сент-Экзюпери» книгашт-влак кумдан палыме писатель нерген лишкырак палдарат.

Книгагудыш пагален ӱжына!

---