Мемнан книгагудышто поэзий пайрем  эртен. Тудын унаже —  поэт, журналист, мурызо Алёна Яковлева лийын. Сылнымутым йӧратыше-влаклан автор  «Ончалтыш»  икымше поэтический книгажым аклаш луктын.

А.Яковлева (Моисеева Елена Юрьевна) – В.А. Абукаев-Эмгакын «Ший памаш» сылнымут фондын, С.Н. Эсаулова лӱмеш «Светлана» сылнымут премийын лауреатше. Авторын почеламутшо-влакым республикысе периодический савыктышлаште, коллективный поэтический сборниклаште лудаш лиеш. Алена чонын куан ден ойгыжым, чыла шижын жа ужын моштымыжым келге философий негызеш почеш.

Вашлиймашышке Марий кугыжаныш университетын студентше-влак, йолташыж ден пашам пырля ыштыше коллегыже-шамыч, тудын талантшым аклыше-влак толыныт ыле. Аленан аваже Маргарита Петровна Яковлева, икымше туныктышыжо Людмила Ивановна Алексеева поро тыланымашан мутым ойлышт. Поэтессын творчествыжым поэт да кусарыше Г.П. Пирогов, З.М. Дудина,  «Ончыко» журналын тӱҥ редакторжо И.Г. Попов, «Кугарня» газетын тӱҥ редакторжо Э.А. Иманаев кӱкшын аклышт. А.Яковлева шке возымо мурыжым йоҥгалтарыш, почеламутымат лудо. Тиде вашлиймаш моткоч волгыдо шӱлыш дене эртыш, кажнын кумылжым ырыктыш.

Ме уло чонна дене поэтессылан эшеат кугу сылнымут кӱкшытым тыланена!

 

---