Тиде поэт кумдан палыме веле огыл, тудо эше моткочак йӧратыме. Калыкле гений Сергей Александрович Есенин шуэн вашлиялтше кугу талантан , калык чоным пален да умылен моштышо возышо лийын. Есенинын сылнымут погыжо кугужак огыл, но жанр шот дене поян: лирический почеламут-влак, поэме, ойлымаш, повесть, критический статья. Кажне жанрыште тудо шкенжым ойыртемалтше сӱретче семын ончыктен. Поэт-лирик Сергей Александрович Есенинын шочмыжлан 125 ий темме лӱмеш книгагудышто «Мыйын чонышко шӱлык пурен …» книжно-иллюстративный ончер почылтын.

Ончерышке поэтын почеламут да поэма, проза да публицистика-шамычым чумырымо сборник-влак вераҥдалтыныт. А кӧлан поэтын илышыж нерген палаш оҥай гын, нунылан писатель-влак Станислав ден Сергей Куняевмытын «Сергей Есенин», А. Панфилован «Есенин без тайн» ,«Сергей Есенин. Воспоминания родных» да молымат темлыме. Ончерыште тыгак С.Есенинын мутшылан возымо муро ден романсым аралыше пластинка-влакым муаш лиеш.

 

---