Андрей Яковлевич Эшпайын шочмыжлан 95 ий темын.
СССР-ын калык артистше, композитор Андрей Яковлевич Эшпай хитыш савырныше  «А снег идет», «Я сказал тебе не все слова», «Мы с тобой два берега» да моло мурыж дене кумдан палыме… Но тиддеч посна тудо симфонийлан, балетлан, опереттылан, хорлан, джазовый пьесылан семым ятыр возен. Адакшым шуко семӱзгар дене шокташлан келыштарен: скрипкылан, фортепианолан, виолончельлан, флейтылан, контрабаслан, гобойлан, саксофонлан, кларнетлан… Эшпайын семже-влак 60 кинофильмыште йоҥгат. Тыгай тӱвыргӧ паша лектыш Андрей Эшпайын кугу кӧргӧ виян, шонымашке шуаш тыршыше лиймыж нерген ойла.  
Марий АССР-ысе Козьмодемьянск олаште шочшо композиторын рвезе жапше сар пагытлан логалын. 1941-ше ийыште Андрей музыкальный школым тунем лектын. Эшпайын «Сережка с Малой Бронной и Витька с Моховой» мурыжо — тиде семмастарын шке пӱрымашыже улеш, разведка взводын лейтенантше Варшава ден Берлиным утарымаште лийын. Сар деч вара Йошкар знамян Орденже дене палемдалтше Эшпай  Москвасе консерваторийыште Н. Я. Мясковскийын, В. В. Софроницкийын фортепиано да композиций класслажым, тыгак А. И. Хачатурянын вуйлатыме аспиранурыжым тунем пытара.  Андрей Эшпай эшежым джаз декат шӱман лийын. 2015 ийыште композитор ош тӱня дене чеверласен.

---