Кугу Отечественный сар мемнан элын да тӱнямбалын историйшытыжат посна верым налеш. Тений ме Сеҥымашын 75 ияш лӱмгечыжым палемдена. Тиде Сеҥымаш ятыр подвиг ден йомдарымаш гоч толын. 1942 ийыште Сталинградын пырдыж воктеныже уло тӱнян пӱрымашыже шоген. Юл да Дон эҥерла коклаште ылыжше  Сталинградский кредалмаш Кугу Отечественный сарын умбакыже кузе каяш тӱҥалмыжым рашемден. Тиде кугу кредалмаш лӱмеш Мамаев курганысе «Героям Сталинградской битвы» историко-мемориальный комплекс чоҥалтын. Колышо салтакым шарналташ манын, кажне ийын тышке тӱжем дене еҥ толеш. Книгагудышто «Тушто кажныже лийын герой…» лӱддымылык урокым 11-ше номеран лицейыште 8-ше классыште тунемше йоча-влаклан эртарыме. 200 кече да йӱд шуйнышо тиде шучко кредалмашыште кажныже герой лийын.

Тунемше-влак пален налыныт, кредалмаш годым Сталинград воктенсе Мамаев курган могай рольым модын, мемориальный комплексын историйже могайрак…

Таче ме элнам аралыше, сеҥымашым лишемдыше

миллион дене колышо салтак ончылан вуйнам савена.

Курымашлшык чап лийже! Курымашлык шарнымаш!

---