Книгагудышто «Финно-угор-влак» серий гыч этнографический занятий-влак умбакыже шуйнат. 7-ше школын 2-шо классыштыже тунемше-влак венгр калыкын историй ден тӱвыражым пален налаш этнографический шагатыш толыныт.

Финн-угор-влакын кугезышт ятыр жап Юл, Кама вӱд воктен, Урал кундемыште илымышт посна племена-влакын йылме икгайлыкыштым арален кодаш полшен.  V-ше курымышто тиде кугу тӱшка деч венгр-влак ойырлен каеныт. Ик вер гыч весыш кусныл коштмек, нуно посна кугыжанышым ыштеныт. Венгр-шамычым вес семынже мадьяр маныт. Шочмо йылмышт — венгр йылме, нуно хант ден  манси йылмыла дене родо-тукым улыт. Венгр калык курымла гоч шке тӱвыра ден йӱлажым арален толын. Поян калык ойпогышто муро ден балладе, йомак ден исторический преданий, калыкмут-влак улыт. Тыгак тиде калык муро ден семым йӧрата. Нунын чардаш куштымашышт кумдан палыме. 

Йоча-влаклан палаш оҥай ыле: лачак Венгрийыште Рубикын Кубикшым шонен лукмо, шариковый ручка, Бейсик программын йылмыже, криптоновый лампочке, «Икарус» автобус — чылажат тушечын. Таче Венгрий — турист-влакым погышо мотор эл. Тусо пӱртӱс, архитектура, тамле кочкыш — Венгрийын шкешотан улмыжын изирак ужашыже.

---