Мемнан книгагудышто «Калык-влак кокласе келшымаш — Россия — Марий Эл Республика» телекӱвар лийын. Тушто ме Курган оласе В.Ф. Потанин лӱмеш йоча да самырык-влакын книгагудо пашаеҥышт дене да тиде оласе тунемше-шамыч дене экран гоч вияш кылым ыштенна. Вашлиймашыш Йошкар-Оласе 17-ше да 29-ше номеран школла гыч йоча-влак толыныт. Тора йолташна-влак марий калыкын поян фольклоржо, тӱвыраже, юмынйӱлаже нерген пален налыныт. Нунылан марий семӱзгар нерген пален налаш поснак  оҥай лийын, адакшым марий семымат колышт кертыныт. Марий Эл Республикысе Калыкле президент школ гыч «Кӱсле» йоча образцовый ансамбльын кӱслезыже-влак уна-шамычлан марий семы йоҥгалтареныт (вуйлатыше — Марий Эл тӱвыран сулло пашаеҥже Ваютина Е.И.). Тыгак Палантай лӱмеш тӱвыра да сымыктыш колледжын студентше-влак мурызо Анна Захарова да концертмейстер Ксения Белова мемнан вашлиймашым сӧрастареныт.

А Йошкар-Оласе йоча-влак Курган ола нерген, тудын калыкше нерген лишкырак пален налыныт, экран вес велен улшо йолташышт-влаклан ятыр йодышым пуэныт. Тыге ме кок оласе келшымашнам пеҥгыдемденна. Тек мемнан келшымаш мурына шуко йӱкан да кужу лиеш.

---