Книгагудышто поэт да киноактер Иванов Кирилл Ивановичын шочмыжлан 110 ий темме лӱмеш пӧлеклалтше  «Йыван Кырла – калык шӱмыштӧ шарнымаш кас эртен. Тудын лӱмжӧ марий кундемыштына веле огыл, тыгак тӱнямбалнат кумдан чапланен: вет лач «Путевка в жизнь» йӱкан икымше фильмыште Мустафан рольжым лачак Йыван Кырла устан модын.

Вашлиймаш касыш уна-влак толыныт — МАССР-ын сулло туныктышыжо, поэт З.В. Ермакова ден Марий Эл Республикысе тӱвыран сулло пашаеҥже, поэт, журналист, кусарыше З.М.Дудина. Зинаида Васильевна Шернур район Марисола школышто Йыван Кырла лӱмеш тоштерым почмаште кугу пашам вораҥдарен, тудо «Йыван Кырлан пӧртылмыжӧ» поэмын авторжо. Тиде вашлиймашке Калыкле президентский школ-интернатын тунемшышт, Марий кугыжаныш университет ден И.С. Палантай лӱмеш тӱвыра да сымыктыш колледжын студентышт, «ГТРК Марий Эл» да«Марий Эл Радион» журналистше-влак толыныт. Уна-шамыч Кирилл Ивановичын кӱчык, но волгалтше ӱмыржӧ нерген  чон гыч лекше кумыл дене каласкаленыт. Зинаида Васильевна Свердлов область, Краснотюринск олаште Йыван Кырлалан почмо шарныктыш оҥа нергенат ойлыш. А Зоя Михайловна ятыр палыдыме историй факт-влакым каласкалыш, поэт да актерлан пӧлеклалтше почеламут-влакым лудо.

Тунемше-влакат ӧрдыжеш ышт код: Йыван Кырлан почеламутшым лудыч, уна-влаклан йодыш-шамычым пуэдышт.

---