Книгагудыштына «Мый да закон» Права лӱдыкшыдымылык школ шке пашажым умбакыже шуя. Т.И. Александрова лӱмеш 11-ше номеран лицейысе 8-ше классыште тунемше-влак «Подростковая жестокость» лӱман лекцийым колыштыныт. Интернетыште самырык-влакын ваш кредалме, икте-весым ӱлыкӧ шындыме койышан видеозапись-влак тунемше-шамычым чон почын мутланымашке ушеныт. Йошкар-Оласе УМВД инспектор, полиций капитан Т.Н. Веденкина примерлаште ончыктен, кушко конден кертеш тыгай шакше койыш самырык-влакым. Тудо умылтарен, самырык-влакым уголовный да административный муткучымаш деке мо конда, тыгак комиссийын ийготыш шудымо йоча-влак дене  ыштен шогымыж нерген ойлен. Инспектор шижтарен: правам пудыртышо-влак нерген чыла сведений базыш пурталтеш, варажым тунемаш але пашаш пурымо годым чыла тидыже тӱжваке лектеш. Татьяна Николаевна  самырык-влакын антиобщественный группировкышт-влак улмо нерген каласкален, нунын осал пашам ышташ таратен шогымышт нерген ойлен. Тунемше-шамыч мероприятий жапыште ятыр йодышым пуэденыт, илышыште лийше тӱрлӧ ситуацийым лончыленыт. Рашемын: нунылан тиде теме оҥай да пайдале.

 

 

---