10 декабрьыште республикыштына кажне ийын Марий тиште кече палемдалтеш. 1998 ий 18 ноябрьыште Марий Эл Республикым Вуйлатышын кӱштымыж почеш тиде пайрем кугыжаныш статусым налын. 1775 ий 10 декабрьыште Санкт-Петербург оласе кевытлашке «Сочинения, принадлежащие к грамматике черемисского языка» лӱман икымше марий грамматикым ужалаш лукмо. Эше акрет пагытыште марий-влак посна тиште-шамычым — тамгам — кучылтыныт. Кажне ешын але тукымвожын шке тамгаже лийын улмаш. Тудын полшымыж дене марий-влак икте-весыштлан тӱрлӧ уверым пуэныт, тыгак шке парымыштым ончыктен кертыныт да тулеч молат.  Тиде пайрем вашеш мемнан книгагудышто «Тамга гыч книга деке: марий тиштын икымше шарныктыш-влакше»  лӱман  мероприятий эртен. Тушко 29-ше номеран школын 8-ше классыштыже тунемше-влак толыныт.Тунемше-влаклан марий тиштын шочымыж ден вияҥмыже, эртыме йыжыҥже нерген, тыгак марий сылнымутлан тӱҥалтышым пыштыше еҥ-влак нерген каласкалыме, презентацийым ончыктымо. Йоча-влаклан палаш оҥай лийын: могай тудо — икымше букварь, 100 ий ончыч мо нерген возен марла лекше газет да тулеч молат.

---