Пеле-пула толашыл ом чокие,

А пӱтынь ямым чон денак айлен

Да шижын тыйын ӱжара гай вийым,

Марий йылмем, мый тый денет ойлем!

Калык поэт Г.Л. Сабанцевын (творческий псевдонимже Ояр) 60 ияш лӱмгечыж вашеш краеведений пӧлемыште «Шӱмсавыш» лӱман книга ончерым сӧрастарыме. Тушко авторын илышыж ден творчествыж нерген каласкалыше литературым чумырымо. А марий поэзийым йӧратыше-влаклан Геннадий Оярын у почеламутшо-влакым лудаш сай йӧн уло.

Геннадий Леонидович — Марий Эл Республикын сулло журналистше, Россий писатель ушемын еҥже, «Чытамсыр курым», «Нумалтыш», «Шӱмсавыш», рушла савыкталтше «Всполохи сердца», «Светом единым» сборник-влакын авторжо. Шке почеламутлаштыже Г.Ояр лудшо-влак дене тыглай мутланымашым тарвата, кудыжо кажне еҥлан пеш лишыл да шерге: йӧратымаш, шочмо вер, еш, икшыве нерген… Да эреак — порылык, умылымаш кумыл дене пырля. 

Г.Л. Сабанцев мыланна кусарыше семынат шерге. Тудо Э.Багрицкийын «Смерть пионерки»,  А.Твардовскийын «Василий Тёркин» поэмыжым марий йылмыш устан кусарен. Геннадий Леонидович республиканский изданий-влакын редакцийлаштышт, радиошто, мӱндыр Чукоткысо районный газетын редакторжо семын пашам ыштен.

Шке почеламутлаштыже тудо калыкнан эртышыжым, кызытсыжым да ончыклыкшым эл дечын ойыраш лийдымын кылдалтмыж нерген шонкала. Литературовед Софья Чеснокован палемдымыж почеш, Г.Сабанцевын поэзийже  —  историйым савырнен ончалын, марий тӱня, марий ял илыш нерген шонкалымаш, шочмо пӱртӱс верч чон йӱлымаш, айдеме кокласе кыл нерген азапланымаш.

Ме Геннадий Леонидовичым юбилейже дене шокшын саламлена да кумылан-влакым книга ончерым аклаш пагален ӱжына.

---