Книгагудыштына Йоча книга арня «Книгам йӧратыше-влакын отрошкышт путешествий» лудмо акций дене мучашлалтын. Тудо лудшына-влак коклаште  шукертак пагалымашым сулен.

Тиде кечын № 76-шо номеран йочасадысе икшыве-влакым Н. Носовын «Приключения Незнайки и его друзей» йомакысе герой-шамыч вашлийыныт. Герой-влакын рольыштым книгагудын ӱшанле лудшыжо-влак — Тимофеев Аким, Солдатов Илья, Ибрагимова Венера да молат — шкак модыныт. Нуно йолташышт-влакым книгам йӧраташ ӱжыныт.

Поэт Цветик йоча-влакым почеламут возаш, мут-влаклан рифмым кычалаш туныктен гын, уста музыкант Гусля шиялтыш да фортопианым мастарын шоктен, сӱретче Тюбик портрет-шамычым сӱретлен, а Гайка ден Винтик «Незнайка учится» мультфильм гыч ужашым ончыктеныт.

Йоча-влак модыш ден конкурслаште участвоватленыт: викторинысе йодыш-влаклан вашмутым кычалыныт, мурым муреныт, Незнайкын портретшым сӱретленыт.

Мучашлан сылнымут герой-влак уна-шамычлан книга-влакым пӧлекленыт, книга дене келшен илаш да книгагудыш корным чӱчкыдын такырташ манын тыланеныт. Пайрем чылалан пеш келшен!

---