21 мартыште В.Х.Колумб лӱмеш республикысе йоча да самырык-влаклан книгагудышто кумдан палыме марий поэтессе, Россий писатель ушемын еҥже, МАССР-ын сулло туныктышыжо Зинаида Васильевна Ермакова дене творческий вашлиймаш лиеш.

Зинаида Ермакова — «Садеран рвезылык», «Садеран корнывожышто», «Телын саламже», «Чоя Марусь» да эше икмыняр почеламут книган авторжо. Тудын почеламут да поэмыже-влак  ятыр гана тӱшка сборниклаше, «Марий Эл», «Кугарня» газетлаште, «Ончыко» журналыште савыкталтыныт, а руш йылмыш кусарыме поэзий корно-влакшым «Вдохновение» сборникыш, «Молодая гвардия»(Москва) журналыш пуртымо, одо йылме дене  «Италмас» газетыш печатлыме.

Зинаида Васильевна ятыр тунемше-влакшым сылнымут деке шӱмаҥден да возымо пашалан кумылаҥден. Нунын кокла гыч шукынжо таче профессиональный писатель ден поэт-влак улыт (З.Дудина, Ю.Соловьев, С.Архипова да т. м.).

Книгагудышто поэт дене вашлиймаш — тиде эре пайрем, тудо южгунамже ӱмыр мучкылан шарнымашеш кодеш. Марий поэзийым йӧратыше-влакым Зинаида Ермакова дене вашлиймашке вучена.

                                                                       Книгагудыш пагален ӱжына!

---