Калык ойпого — кажне калыкын аклаш лийдыме поянлыкше. Тудын гочын йоча шке йылмыжым йӧраташ веле огыл, тыгак  кугезе коча-кован чон поянлыкшым шымлен, пален налеш, икымше тӱняумлымашыже почылтеш. Фольклор  мемнам тукымвожна деке чакрак ышта, тугеже ожнысо пагыт дене кылым шочыкта. 21 февральыште Российыште  Тӱнямбалсе шочмо йылмын кечыже палемдалтын. Тиде кечын мемнан книгагудына Ульяновысо Фондын эртарыме «Мемнан тукымвожна. Калык ойпогым лудына» Всероссийский акцийыш ушнен. Тиде кечын участник-шамыч «Марий мландын патырже-влак» йӱкын лудмашыште,  «Модыш, мыскара, койдарчык» калык ойпого пайремыште моштымашыштым ончыктеныт, «Европын пытартыш чимарийже-влак» лӱман книга ончерым ужыныт.

Марий-влак акрет финно-угор калык тӱшкаш пура. Марий калыкын преданийже ден легендыже-влак илышын тӱҥалтышыжым, пӱртӱсын вийжым, историйыште лийше кугу событий-влакым шымлымаште полшат.

29-ше номеран «Ший оҥгыр» йочасадысе «Колобок» ден «Пампалче» группыш коштшо икшыве-влак «Модыш, мыскара, койдарчык» калык ойпого пайремыште марий калыкын тӱвыра поянлыкше дне палыме лийыныт: калыкмутым, шотлеммутым тунемыныт, мурым муреныт, туштым туштеныт, марла кушталтеныт. Нуно чыланат марий вургеман лийыныт.

Йошкр-Оласе 7-ше номеран школышто 1-4 класслаште тунемше-влак «Марий мландын патырже-влак» йӱкын лудмашыште участвоватленыт. Нуно марий патыр Онар, Чумбылат, Чоткар, Болтуш, Кокша, Акпарс, Акпатыр да моло талешке-влак нерген легенде ден преданий-влакым йӱкын лудыныт.

Тыгак книгагудыш толшо лудшо-влак марий калыкын юмынйӱлаж нерген каласкалыше «Европын пытартыш чимарийже-влак» книга ончерым аклен кертыныт.

Тыгай акцийыште участвоватлымаш кушкын толшо самырык тукымым тӱлӧ калыкын йӱлажым аклаш, калык ойпогым утларак палаш туныкта.

---