Калыкын икоян улмо кече да Марий Эл Республикын кечыже вашеш книгагудышто «Марий мланде-Российын сымыстарыше кундемже» шинчымаш шагат эртен. Тудо марий калыкын шкешотан тӱвыраже да шочмо кундемын поян историйже нерген каласкален. Вашлиймашыште «Светлячок» рӱдерын воспитанникше-влак лийыныт.
Российыште ятыр калык ила. Кажныжын шке йӱлаже, историйже, калык ойпогыжо. Тиде вашлиймашыште Юл кундемысе калык-влаклан поснак кугу тӱткышым ойырымо — нунын пӱрымашышт да тӱрлӧ национальностян культурышт Российын ик исторический радынаштыже тӱрлӧ тӱсан шӱртӧ семын кузе пуналтме нерген ойленыт.
Вашлиймаш годым «Браслеты единства» усталык мастерской лийын. Тудым «Движение Первых» ушемын активистше Роман Онучин эртарен. Тудын полшымыж дене йоча-влак Российысе триколор пеледышан шарнымаш аксессуарым — кидшолым — кумылын ыштеныт.
«Ынде нине кидшол-влак мыланна ушештараш тӱҥалыт: ме — ик кугу да келшен илыше элын ужашыже улына», — чон гыч лекше куан дене пайлалтыныт участник-влак. Самырык уна-влак мӧҥгышкышт чевер сувенир дене веле огыл, шӱмыш переген пыштыме у шинчымаш дене да марий мландын поро шӱлышан улмо нерген шонымаш дене каеныт.
