Марий тиште кечын книгагудышто пайремын историйжылан пӧлеклалтше «Мемнан историйыште уло лаштык» краеведений шагат лийын. Йошкар-Оласе 2-шо номеран кыдалаш общеобразовательный школ гыч тунемше-влак молан лач 10 декабрьыште марий тиште кече палемдалтмым пален налыныт, марий возыктышын шочмо историйже дене палыме лийыныт, мультимедийный презентацийын кадрыштыже марий калыкын икымше марий грамматикыжым да ондаксе текстше-влакым ужыныт. Нуно тыгак кызытсе марий йылмым вияҥдымашке кугу надырым пыштыше лӱмлӧ марий шанчызе-влак нерген пален налыныт.

Поснак йоча-шамычым ешыште але тукымышто символлан шотлалтше геометрий пале-тиште да тамга нерген каласкалыме кумылым савырен, тыгак информацийым, парымым да моло кӱлешан уверым сераш кучылтыныт. Кажне ешын шке тукым палыже лийын-тамга, тудо вургем тӱрыштӧ ончыкталтын. Тыгай пале-влакым 30-шо ийла мучаш марте кучылтыныт. Тӱрлымӧ гыч айдемын могай кундем гыч да могай тукым гыч улмыжым умылаш лийын. Нуно марий орнаментын элементше семын геометрий тамга – тиште-влакым куанен сӱретленыт. Вашлиймаш моткоч пайдале да оҥай лийын: Марий тиште кече марий калыкын тӱвыра ойыртемжым да Российын йылме тӱрлылыкшым арален кодымаште кугу рольым модеш.

---