Вашлият кажным, порын ончалын,

      Налын кидыш ош кинде-шинчалым,

      Марий Эл, пӱрымаш тыйын тиде,

      Той кылтат чевер муро ден пидме…

                                           В.Изилянова

 

 

 

 

---

Кажне ийын, 4 ноябрьыште, ме Марий Эл Республикын шочмо кечыжым палемдена. Тиде пайрем вашеш В.Х.Колумб лӱмеш йоча да самырык-влаклан книгагудо Йошкар-Оласе Шинчымаш виктем дене пырля  «Мый йӧратем родной элемым…» почеламут конкурсым эртареныт. Тушто оласе школлаште тунемше йоча-влак шке вийыштым тергеныт.

Конкурсышто участвоватлыше-влак кум тӱшкалан шелалтыныт: 1-4 классла, 5-7 классла да 8-9 классла. Нуно марий поэт-влакын шочмо эл нерген возымо почеламутышт-влакым лудыныт. Почеламутым лудмаш — тиде искусство. Тудын шкенжын ойыртемже уло. Йоча-влакын лудмыштым жюри аклен. Тушто поэтессе, Марий Эл Республикысе сымыктышын сулло пашаеҥже, Россий писатель ушемын еҥже А.Иванова, Марий Эл Республикын калык артисткыже М.Медикова, «Ямде лий» газетын журналистше Л.Григорьева лийыныт. Нуно ӱдыр-рвезе-влакын лудмо произведенийыштын тӱҥ шонымашым почын пуымыштым, мастарлыкыштым, шкем кучен моштымыштым шотыш налыныт.

Жюрин аклымыж почеш сеҥыше радамыш логалыныт:

 

I вер	Ибраева Арина (29-ше №-ан шк., 4 Г класс);
	Юрасова Ксения ( 29-ше №-ан шк., 6 А класс);
	Роженцов Никита ( 10-шо №-ан шк., 9 В класс).
II вер	Прокопьев Илья (7-ше №-ан шк., 4 Д класс);
	Краснова Кристина (13-шо №-ан шк., 6 А класс);
	Яковлев Александр (21-ше №-ан шк., 8 В класс).
III вер	Макарова Арина (С.Радонежский лӱмеш гимназий, 4 класс);
	Александрова Анна (27-ше №-ан шк., 6 Б класс);
	Романова Ульяна (Калыкле президент школ-интернат, 7 А класс);Яндыганова Любовь (14 -ше №-ан гимназий, 8 Г класс).

Конкурс творческий шӱлышан дене эртен. Йоча-влак моткоч тыршеныт. Нуным конкурслан ямдылаш полшымыштлан ме туныктышо, воспитатель, ача-ава-влаклан таум ыштена.

---

---