«Сеҥымаш. Проблеме. Перспективе» йыргешке ӱстел книгагудо пашаеҥ-влакым 2024 ийысе пашам иктешлаш, ончыклык сомылым рашемдаш поген.
Тӱҥалтыш мутым книгагудо директор Екатерина Аркадьевна Ерпылева да Марий Эл Республикысе тӱвыран архив шотышто пӧлкажын начальникше Любовь Афанасьевна Кадочникова ойленыт.
Тӱҥ доклад кугыжаныш заданийым кузе шуктымо йодыш дене лийын. Тыгак книгагудын сай паша лектышыже нерген ойлымо, ойыртемалтше пашаеҥ-влакым саламлыме.   Пӧлка вуйлатыше-шамыч Еш идалыкым да Лейтенантский прозын ийжым кузерак палемдыме нерген, краеведений дене сылнымутым кузерак шарыме нерген, справочно-библиографический сомыл кузе вияҥын да моло тӱрлӧ паша нергенат каласкаленыт. Библиотечный фондым шуарыме, улшо книга-влакым аралыме йодышымат тарватыме.
Мучашлан книгагудо ончылно 2025 ий Элым аралышын ийже семын увертаралтме дене кылдалтше паша-влакым шындыме, вет тиде ий Кугу Сеҥымашлан 80 ий темме денат кылдалтын.

---