2017 ий 15 февральыште  Йошкар-Олаште «Мутын куанже» православный книга ончер-форум почылтын.

Ончерым  Руш Православий Черкын Савыктыш Ушемже ден  Йошкар-Ола да Марий епархий, тыгак  «Православный книга» лӱман Книга савыктыш да ужалыше организаций-влакын ассоциацийышт чумыреныт. Форум Руш Православий Черкыш Патриаршествым уэш пуртымылан 100 ий темме лӱмеш да Православий  книга кечылан пӧлеклалтын.

16 февральыште мемнан книгагудышто семинар эртен. Тушто кугыжаныш да муниципал библиотекылаште книга фондым уэмдыме шотышто проблемым, тыгак черке ден кугыжаныш книгагудо системын пырля пашам ыштыме йодышым каҥашыме.

«Калейдоскоп» ончер пӧлемыште «Мом шылта теҥыз пундаш?» лӱман сӱрет ончер почылтын. Тушто Йошкар-Оласе 7-ше номеран Йоча сымыктыш школын тунемшыже-влак шке пашаштым аклаш луктыныт. Теҥыз пундашын мотор да  ӧрыктарыше илыш тӱняже ончерыш толшо-влакым шке векше сӱрет гоч савыра.

Ончер кажне кечын (шуматкече деч молыжо) 9 гыч 16 шагат марте пашам ышта. Чыладам книгагудыш пагален ӱжына!

8 февраль — Самырык антифашистын кечыже. Тиде датылан пӧлеклалтыныт «Сар дене когаргыше йоча шӱм» сылнымут аккорд-влак. Мероприятийыш 29 номеран школысо 3 «а» да 19 номеран школысо 4 «г» классын тунемшыже-влак толыныт. Вашлиймаш Кугу Отечественный Сар пагытыште сеҥымашым лишемдымаште шке илышыштым лӱдде пуышо ӱдыр-рвезе-влакым шарныме амал дене эртаралтын.

В.Х.Колумб лӱмеш Республикысе йоча да самырык-влаклан книгагудышто 27 февральыште да 1 мартыште республикысе кугыжаныш да муниципальный книгагудылаште йоча да самырык-влак дене пашам ыштыше специалист-шамыч погынымашым эртарат. Нуно эртыше 2016 ийыште ыштыме пашаштым иктешлат, ончыклык паша планым пеҥгыдемдат.

3 февральыште книгагудысо Ончер пӧлемыште  «Фольклорист, этнограф, краевед» лӱман мероприятий эртен. Тудо лӱмлӧ айдеме, краевед Т.Е.Евсеевын шочмыжлан 130 ий темме амал дене ямдылалтын.

Т. Евсеев  — марий кундемнан  пагалыме эргыже, краевед, этнограф, Калыкле тоштерын икымше директоржо. Тудо марий калыкын тӱвыражым, илыш-йӱлажым шымлымаште кугу надырым пыштен.

Торгово-Технологический  колледжын студентше-влак дене вашлиймашыш  Т. Евсеев лӱмеш  калыкле тоштерын пашаеҥышт толыныт. Тиде:  историй науко кандидат, этнографий пӧлкам вуйлатыше Байдимиров Д.А., этнографий пӧлкан старший научный сотрудникше-влак  Васканова Н.А., Григорьева А.О., археологий пӧлкан старший научный сотрудникше Краснова Е.Ю. Нуно  Т. Евсеевын илыш да творческий корныж нерген фильмым ончыктеныт, тудын  тоштерыште аралалтше этнографий коллекцийже нерген каласкаленыт. Тыгак  «Т.Евсеевын шӧртньӧ фонджо» у книга дене палдареныт.

Залыште Т.Евсеев нерген каласклыше «Калык тӱвырам аралыше» лӱман книга ончерым аклаш лийын.

Самырык герой-антифашистын кечыж лӱмеш книгагудышто йӱкын лудмаш лийын. 76-шо номеран йочасадын икшывыже-влак Л.Кассильын «Тишка рвезе да немыч отряд» лӱман ойлымашыжым колыштыныт. Самырык партизан тушман-влакым купышко ондален конден кертмыж дене геройло поступкым ыштен. Шке илышым чаманыде, лишыл еҥ-влакым арален кодаш — тиде кугу подвиг, осал ваштареш лӱдде шогымаш. Тыгай шонымашымак шыҥдарен автор шке произведенийыштыже. Тачысе йоча-шамычланат тудо шонаш таратыше лийын кодеш.