2016 ий 27 октябрьыште  В.Х. Колумб лӱмеш Республикысе йоча да самырык-влаклан книгагудышто «Лудаш жап» лӱман самырык тукымын XI-ше лудмашыже эртен. Тиде гана тудын темыже : «Книгагудо-влакын программно-целевой да проектный пашашт».

Марий Эл Республикысе муниципал книгагудо вуйлатыше ден специалист-влак, тыгак Йошкар-Ола тунемме тӧнежласе книгагудо пашаеҥ-влак йоча да самырык тукымым книга дене обслуживатлыме пашам вияҥдымаште шийвундо йодышым каҥашеныт. Марий Эл Республикын тӱвыра, печать да калык-влакын пашашт шотышто министерствын специалистше Г.Г.Чемеков «2013-2020 ийлан Марий Эл Республикын кугыжаныш национальный политикыже» кугыжаныш программе почеш пашам виктарыме нерген каласкален.

Ужар чодыра ден Элнет серыштет

Ужар сывынла леведалтын шогет.

Мотор, йӧраталме Марий кундемна,

Ме тыйым моктен мурена.

С.Вишневский

Кажне ийын, 4 ноябрьыште, ме Марий Эл Республикын шочмо кечыжым пайремлена. Тидланак пӧлеклалтын  В.Х.Колумб лӱмеш Республикысе йоча да самырык-влаклан книгагудышто эртыше почеламутым лудмо оласе конкурс.

Ю татын ош тӱняшке толын,

Тӱнян куанымыжым кольым.

Пӱртӱсын лоҥыштыжо шолын,

Тыршен модам мый шкемын рольым.

Республикысе йоча да самырык-влаклан В.Х.Колумб лӱмеш книгагудо сылнымутым йӧратыше-влакым самырык поэтессе Надежда Васильева-Эмыкан дене вашлиймашыш чумырен. Надеждам 2015 — 2016 ийлан Марий Эл Республикын литературышто, культурышто да искусствышто  Олык Ипай лӱмеш Кугыжаныш премийлан темлыме.

1-ше шыжа — Тӱнямбал музык кече. Кугу да изи концерт площадкылаште кумдан палыме тӱрлӧ сем ден муро-влак йоҥгеныт. Музыкым йӧратыше-шамычлан тиде кече чынжымак кугу пайремыш савырнен. Мемнан лудшына-влак 3-шо шыжаште «Джаз импровизаций-влак» лӱман концертым колышт кертыныт. Тӱнямбал классикан произведенийлам Марий Эл Республикысе тӱвыра да сымыктыш колледжын студентше-влак йоҥгалтареныт.

В.Х.Колумб лӱмеш Республикысе йоча да самырык-влаклан книгагудын пашаеҥышт «Шучко сӱан» («Страшная свадьба») интерактивный книгам ыштеныт. Тудо марий калык йомак-влак негызеш чоҥалтын. Книга «Проект 31 (сентябрь 2016)» лӱман интерактивный сылнымутышто кажне тылзын эртарыме конкурсышто сеҥышыш лектын. Тыгай  конкурсым  «Гиперкнига» савыктыш увертара. 

3-шо шыжа гыч сылнымут да сымыктыш пӧлемыште «Музык шонанпыл» ончер-кроссворд почылтеш. Тудо Тӱнямбалсе Музык кечылан пӧлеклалтеш.

5-9 класслаште тунемше-влакым кроссворд-шамычым решатлаш пагален ӱжына. Ончерыште улшо книга-влак полыш семын лийыт. Сеҥыше-влакым пӧлек вуча.

Ме тендам 304-ше пӧлемыште 9 гыч 16 шагат марте кажне кечын (шуматкече деч посна) вучена. Ончер-кроссворд 24-ше шыжа марте шуйна.

27 шыжан В.Х. Колумб лӱмеш республикысе йоча да самырык-влаклан книгагудышто «Ойго подылтыш» лӱман  информационный шагат эртен. Тушто Российыште арака йӱмӧ проблемым тарватыме. Оласе 9-ше номеран школын тунемшыже-влак дене «Трезвая Марий Эл» мер организацийын вуйлатышыже Павел Марышев вашлийын.