Шошо каныш жапыште оласе 16-шо номеран школ гыч йоча-влак «Корней коча дек унала» квест-модышышто лийыныт. Тудо кумдан палыме йоча писатель Корней Иванович Чуковскийын юбилейжылан пӧлеклалтын. Йоча-влакым «Крокодил» йомак гыч персонаж-шамыч — Тотоша ден Кокоша — вашлийыныт.

27 ӱярнян Йоча книга арняште 9 номеран  общеобразовательный школын тунемшышт дене пырля интерактивный путешествий эртен. «Жапым йомдарыме нерген йомакыште» йоча-влак кузе жапым аныклаш, писын лудаш, мӧҥгысӧ пашам сайыш шукташ лийме йодышым каҥашеныт.  

 «Канде кайык» гимназийын 3 классыште тунемшыже-влак кумдан палыме «Марий Чодыра» Кугыжаныш парк мучко  виртуальный экскурсийым ыштеныт. Тыгай мероприятий Экологий ийлан пӧлеклалтын. Парк мемнан республикыште веле огыл, тыгак ӧрдыж кундемлаштат палыме.

 «Лудаш, тӱням сайракым ышташ манын!» лӱман Йоча книга арням республикысе писатель-влак Екатерина Михайловна Клюжева да Сергей Евгеньевич Шелепов дене вашлиймаш почо. Тудо «Йомак почеш йомак» маналтын.

Йомак пӧлемыште  76-шо номеран йочасадысе икшыве-влак профессий тӱняшке миен коштыныт. А чынрак гын — пален налыныт, кушто да кӧлан пашам ыштен кертыт йӧратыме ава, кова, кока-влак. Тӱҥалтышлан Сергей Михалковын «А мо тендан?» кумдан палыме почеламутшо йоҥгалте. Тушто  лач ӱдырамаш профессий-влак нерген ойлалтеш.

 Кажне ийын, 1994 ий 5 ӱярня гыч тӱҥалын, Потребительын праважым аралыме тӱнямбал кече палемдалтеш. 2017 ийыште потребительский организаций-влакын Международный Федерацийже электронный коммерцийын йогынжылан тӱткышым ышташ темлен да девиз шотеш  «Consumer Rights in the Digital Age» — «Потребитель права  цифровой саманыште» — ойым налын.

15 ӱярнян книгагудышто 9-ше номеран школышто кугурак класслаште тунемше-влак дене «Кунам сату куаным ок кондо» лӱман модыш эртен.

Мемнан книгагудышто Россиийысе лудмо конкурсын муниципальный этапше эртен. «Илыше классике»  конкурс –  Российысе эн кумдан шарлыше йоча сылнымут проект. Тӱҥалтыш вич ий жапыште тушко 84 эл да РФ-се 85 регион гыч 10 миллион йоча ушнен. Тиде конкурс кум кугу премийын лауреатше лийын, Россий Президент В.В.Путин «Илыше классикым» тачысе самырык тукымын книга дек мелын лияш ик эн сай йӧн манын палемден. Мемнан дене эртыше конкурсышто 6-10-шо класслаште тунемше 31 йоча шке мастарлыкшым терген.  Жюрим Марий Эл Республикын Калык артисткыже Н.И. Репьёва вуйлатен.