4 майыште В.Х. Колумб лӱмеш Республикысе йоча да самырык-влаклан книгагудышто Йошкар-Оласе Т. И. Александрова лӱмеш 11 номеран лицейын икымше классыште тунемшыж-влак ден Сергей Алексеевын «Солдатская сила» ойлымашыжым лудыныт.  Тудо «Йоча-влаклан сар нерген лудына» Тӱнямбал акций негызеш эртен. Йоча-влак Москва верч кредалмаш нерген кумылын колыштыныт. 

Сеҥымаш кече мыланна — поснак шерге пайрем. Ме шучко тушманым сеҥенна, кудыжым иктат сеҥен кертын огыл. Ме палышаш улына, кӧ мыланна сеҥымашым лишемден, шке эрыкшым пуэн. Ветеран-влаклан мланде марте вуйнам савена. Нуно огыл гын, можыч, ты тӱняште ме огынат лий ыле. Тиде кече уло тӱнялан урок семын лийын кодеш. Сар — тиде ойго, тудо мӧҥгеш пӧртылшаш огыл! Мемнан книгагудыштына Сеҥымаш кечылан пӧлеклалтше «Могай сай тӱняште сар дечын посна!» почеламут конкурс эртен. Тушто йочасадыш коштшо да изирак класслаште тунемше-влак шке вийыштым тергеныт.  Чылаже 92 йодмаш пурен. Конкурсышто В. Степановын, С. Маршакын, М. Владимовын, А. Усачевын, Л. Тассин, марий поэт В. Колумбын да ятыр молын почеламутыштым йоча-влак уло кумылын каласкаленыт. 

 «Валентин Колумбым лудына» республиканский акций негызеш 3 майыште книгагудышто кумдан палыме марий поэт-новаторын шочмо кечыжлан пӧлеклалтше мероприятий эртен. «Колумб: илышын татше-влак» виртуальный фотоальбом дене  Калыкле  президентский школын 6″Б» классыште тунемшыже-влак палыме лийыныт. 

28 апрельыште книгагудышто «Тылзышке — Незнайке дене пырля» лӱман модыш-путешествий эртен. Тудын девизше: «Космонавт лийнет гын, шуко палышаш улат!» Тушко  «Йоча пагыт Рӱдер» гыч йоча-влак дене пырля ача-ава-шамычат толыныт.

28 апрельыште книгагудышто «Колумб лудмаш » регион кокласе  I-ше научно–практический конференций эртен.  Конференцийышке  кумдан палыме шанчызе, поэт да  журналист-влак, туныктымо тӧнежлаште тыршыше преподаватель-шамыч, книгагудо пашаеҥ, студент да В.Колумбын творчествыжым пагалыше чыла кумылан-влак погыненыт.

27 апрельыште  37 номеран йочасадын икшывыже-влак йоча писатель Г.Х.Андерсенын йомак тӱняшкыже миен коштыныт,  «Принцесса на горошине» йомакшым колыштыныт. Ӱдыр-рвезе-шамыч уло кумылын Андерсенын илыш-корныж нерген пален налыныт. Тудын возымыжо почеламут семын куштылгын лудалтеш. Южо йомакше ойган кумыл дене тӱҥалыт да тыгак мучашлалтыт. А кӱшнӧ каласыме йомак — пиалан мучашан.

Кажне калыкын шке талешкыже-влак улыт. Руш калык Александр Невскийым, Дмитрий Донскойым пагален шарна, татар — Габдулла Тукайым, Сююмбикем, башкир — Салават Юлаевым… Марий калык гын Чумбулат, Мамич Бердей, Болтуш, Акпатыр дене кугешна.  «Марий ушемын» пунчалже почеш 26 апрельым Марий талешке кече семын палемдена. 

 26 апрельым таклан огыл ойыреныт: истрийым ончалаш гын, 18-ше курымышто Малмыж орым арален налме годым Болтуш лӱман он шочмо эл верч шогышыжла  патыр семын колен. Талешке-влак  нерген ятыр преданий ден легенде-влак, йомак ден муро-шамыч тачат аралалтыт. Ме тыланда акрет годсо талешке-влак нерген книга-шамычым лудаш темлена.