В.Х.Колумб лӱмеш Республикысе йоча да самырык-влаклан книгагудышто 27 февральыште да 1 мартыште республикысе кугыжаныш да муниципальный книгагудылаште йоча да самырык-влак дене пашам ыштыше специалист-шамыч погынымашым эртарат. Нуно эртыше 2016 ийыште ыштыме пашаштым иктешлат, ончыклык паша планым пеҥгыдемдат.

3 февральыште книгагудысо Ончер пӧлемыште  «Фольклорист, этнограф, краевед» лӱман мероприятий эртен. Тудо лӱмлӧ айдеме, краевед Т.Е.Евсеевын шочмыжлан 130 ий темме амал дене ямдылалтын.

Т. Евсеев  — марий кундемнан  пагалыме эргыже, краевед, этнограф, Калыкле тоштерын икымше директоржо. Тудо марий калыкын тӱвыражым, илыш-йӱлажым шымлымаште кугу надырым пыштен.

Торгово-Технологический  колледжын студентше-влак дене вашлиймашыш  Т. Евсеев лӱмеш  калыкле тоштерын пашаеҥышт толыныт. Тиде:  историй науко кандидат, этнографий пӧлкам вуйлатыше Байдимиров Д.А., этнографий пӧлкан старший научный сотрудникше-влак  Васканова Н.А., Григорьева А.О., археологий пӧлкан старший научный сотрудникше Краснова Е.Ю. Нуно  Т. Евсеевын илыш да творческий корныж нерген фильмым ончыктеныт, тудын  тоштерыште аралалтше этнографий коллекцийже нерген каласкаленыт. Тыгак  «Т.Евсеевын шӧртньӧ фонджо» у книга дене палдареныт.

Залыште Т.Евсеев нерген каласклыше «Калык тӱвырам аралыше» лӱман книга ончерым аклаш лийын.

Самырык герой-антифашистын кечыж лӱмеш книгагудышто йӱкын лудмаш лийын. 76-шо номеран йочасадын икшывыже-влак Л.Кассильын «Тишка рвезе да немыч отряд» лӱман ойлымашыжым колыштыныт. Самырык партизан тушман-влакым купышко ондален конден кертмыж дене геройло поступкым ыштен. Шке илышым чаманыде, лишыл еҥ-влакым арален кодаш — тиде кугу подвиг, осал ваштареш лӱдде шогымаш. Тыгай шонымашымак шыҥдарен автор шке произведенийыштыже. Тачысе йоча-шамычланат тудо шонаш таратыше лийын кодеш. 

25 январьыште В.Х.Колумб лӱмеш  Республикысе йоча да самырык-влаклан книгагудышто «Сеҥымаш. Проблеме. Ончыклык паша» лӱман йыргешке ӱстел лийын. Тушто 2016 ийыште ыштыме пашам иктешлыме.

Йошкар-Оласе 29-ше номеран школын 1-ше «Б» классыште тунемшыже-влак Азбука дене чеверласеныт. Нуно йомак тӱнялашке коштын савырненыт,  Буратино, Алиса Рывыж, Незнайка, Мудреч Тумна, фиксик Нолик, Чоҥышо Боб  вашлийыныт. Кажне станцийыште  ӱдыр-рвезе-влак тӱрлӧ оҥай, но неле йодыш-шамылан вашештеныт, модыш дене модыныт. А теве  Буратинолан Азбукым пӧртылташ полшеныт. Тыге кажне участник пайрем шӱлышым шижын да «Азбукым тунемме удостоверенийым» налын.

19 январьыште книгагудыштына «Литературные параллели: от творческого наследия Толкина к научно-познавательной литературе» лӱман интерактивный викторине лийын. Тудо англичан писатель, поэт, сӱретче, профессор, сылнымут доктор, лингвист Джон Рональд Руэл Толкинын шочмыжлан 125 ий темме лӱмеш эртаралтын. Мероприятийыште Йошкар-Оласе 9-ше номеран школын 8-ше классыште тунемшыже-влак лийыныт.

Ганс Христиан Андерсен мемнан изина улмо годымак пӧртышкына поро юзо семын шиждымын толын пура. Тудо чынжымак йомак тӱнян мутмастарже улеш.

19 январьыште  Йошкар-Оласе 9-ше номеран школын кокымшо классыште тунемшыже-влак кумдан палыме йомакче Г.Х.Андерсенын ӧрыктарыше тӱняшкыже миен коштыныт.