Книгагудын ончер пӧлемыштыже «Йомак деке унала» сӱрет выставке почылтын. Радына-шамычым  Т.И. Александрова лӱмеш 11-ше номеран лицейын 1 «А» классыште тунемше-влак руш калык йомакла негызеш ыштеныт. Йомак йолгорнышто  Колобокымат, Царевна-жавамат,  Лумӱдыр ден Сивка-Буркамат ужаш лиеш. Паша техникат оҥай — йоча-влак чия ден карандашым огыл, а тыглай пластилиным кучылтыныт. Пластилин гыч изи тыртыш-шамычым ыштен, мозаике техника йӧн дене сӧрал сӱретым шочыктеныт!

Экспозиций  30 ноябрь марте пашам ышта.

Тендам кажне кечын (шуматкече деч посна)  9.00 гыч 16.00 шаг. марте вучена.

Книгагудыш пагален ӱжына! 

Совет да руш поэт-песенник Михаил Исаевич Таничлан (Михаил Исаакович Танхилевич 1923-2008) 100 темын. Тудо Таганрог олаште шочын, йочаж годымак уло кумылын сӱретлен, почеламутымат возаш тӧчен, но эн чотшо футболым йӧратен. Тунем пытарыме аттестатым  Михаил Исаевич Кугу Отечественный сар тӱҥалме кечын 1941 ий 22 июньышто налын да вигак фронтыш каен. Сар деч вара радиошто да прессыште тыршен, а 1956 ий гыч  Моско изданийлаште  Михаил Таничын икымше почеламутшо-влак савыкталташ тӱҥалыныт. Тудын усталык корныжо 1961 ийыште тӱҥалеш, вет лач тунам Ян Френкельын семжылан возымо «Текстильный городок» муро шочеш. Шомакше, мутат уке, М.Таничын лийын. Тиде мурым Майя Кристалинская мурен. Умбакыже ятыр муро, книга, почеламут ош тӱням ужын…

Шыже толмо дене кумыл кеҥеж кече гаяк лийже манын, «Тошто пластинкын ритмже» рубрик Михаил Таничын «Лётная погода» да «Радовать»  винил дискше-влакым темла. 

 Поэтат кертеш мурен,

Кумыл нӧлтын, ӱмырешлан

Еҥын шӱмышкӧ пурен

Стихше порын вераҥеш гын…

Нине почеламут корнылан авторжо — марий поэт-фронтовик Борис Григорьевич Данилов. Тений тудын шочмыжлан 1оо ий темын. Краеведений пӧлкаште поэтын лӱмгечыжлан пӧлеклалтше «Мемнан илыш – тура йолгорно» книжно-иллюстративный ончер почылтын. Борис Григорьевичын сылнымут талантше эр почылтын, икымше почеламутшо «Ямде лий» пионер газетыште савыкталтын. 1941 ийыште педучилищым тунем лекмеке, 18 ияш выпускникым фронтыш колтат. Неле кредалмаш кокла гыч тудо почеламут-влакым возен да «Родина верч» альманахыш колтылын. Борис Данилов –  сар, гражданский, патриотический темылан призведенийым возыш автор. Ик эн кугу пашаже – Совет Союз Герой Михаил Лебедевын подвигше нерген каласкалыше «Миша-артиллерист» документальный повесть. Ончерыште Борис Даниловын поэтический сборникше деч посна, тудын илыш корныж нерген каласкалыше журнал-влакым вераҥдыме.

 Книгагудыш пагален ӱжына!

9 сентябрьыште кумдан палыме руш поэт, кусарыше, йоча книга-влакын йӧратыме авторжо Борис Владимирович Заходерын шочмыжлан 105 ий темеш.

Лачак тудо тунемше-влаклан Шонымаш элыште улшо «Я» букван, Китын да Котын приключенийышт нерген оҥайын каласкален. Мастарын лӱмгечыж вашеш книгагудышто «Мыйын Шонымашем» книжно-иллюстративный ончерым сӧрастарыме. Шӧрлыклаште улшо литератур изи лудшо-влакым йомак, почеламут-шамыч дене куандара.

Олык Ипай лӱмеш Кугыжаныш премийлан тений 55 ий темеш. Тудо сылнымутышто, тӱвыра але сымыктыш аланыште кӱкшытыш шушо самырык еҥ да усталык коллективлан кок ийлан ик гана пуалтеш. Премий марий поэт-новатор Олык Ипайын (Ипатий Степанович Степанов)  лӱмжым нумалеш.

Тиде лӱмгече вашеш краеведений пӧлемыште  книжно-иллюстративный ончер почылтын. Тушто тӱрлӧ ийлаште премий дене палемдалтше лауреат-влак — поэт Валентин Колумб, композитор Эрик Сапаев да шуко моло нерген каласкалыше книга, журнал, альбом-шамыч вераҥдалтыныт. Кумылан-влакым нунын нерген лишкырак палыме лияш вучена.

Книгагудыш пагален ӱжына!

XIX курымсо писатель-влак кокла гыч Лев Николаевич Толстой гай иктат сылнымутыш тыге келгын пурен кертын огыл. Тидын нерген сайрак пален налнеда? Тугеже ме тендам «Ме тудын лӱмжӧ дене кугешнена» сылнымут композицийым ончалаш темлена. Тудо кугу руш писательын 195 ияш лӱмгечыжлан пӧлеклалтын. Кугурак класслаште тунемше да студент-влак Толстойын илыш да усталык пашаж дене лишкырак палыме лийын кертыт, тудын тӱнямбал кӱкшытан эн сай произведенийжылам ушештарат, писательын современникше-влакын шарнымашыштым  видеофрагментлаште ужын кертыт.

Тӱшкан погынен толшо-влаклан ончылгоч возалташ телефон: 34-15-12

Пагалыме лудшо-влак!

1 сентябрь гыч книгагудо телымсе паша жапыш кусна:

Шочмо — изарня: 9.00 – 18.00
Кугарня: 9.00 – 16.00
Шуматкече — каныш
Рушарня: 9.00 – 16.00

Кажне тылзын 4-ше вӱргечыже — санитар кече.

Книгагудышко пагален ӱжына!