Книгагудын эн изи лудшыжо-влак  сылнылык тӱняшке уэш путешествий  корным кученыт. Ты гана  нуно живописьын чапланыше жанрже — портрет да натюрморт — дене палыме лийыныт.  Кумдан палыме сӱретче-влакын пашаштым ончен, нуно эн мотор, эн онай радына-влакым ойыреныт.

Йоча-влак кисточке да гушь полшымо дене пырля шкештат тӱрлӧ тӱсан натюрмортым ыштен онченыт. 

Кызыт Санкт-Петербургысо «Бродячая собака» лӱман кафем шагал еҥ пала. А теве ХХ-шо курым тӱҥалтыште тудо пеш кумдан чапланыше лийын. Тушто К.Бальмот, Н.Гумилев и А.Ахматова, О.Мандельштам, И.Северянин да В.Маяковский чӱчкыдын погыненыт улмаш. Тиде жап руш поэзийын пеледме пагытше лийын. Варажым тиде пагытым Ший курым ( Серебряный век) манаш тӱҥалыныт.
«Тиде ям тӱняшке, тиде ший тӱняшке» аграрный колледжын студентше-влакат логал кертыныт, «Бродячая собака» виртуальный кафен омсаже мемнан книгагудышто почылтын. Тунемше-влак поэт-шамычын илышышт гыч оҥай фактлам пален налыныт, нунын возымо почеламутыштлан келыштарыме романс ден муро-влакым колыштыныт.

Тый ончык ӱж, атакышке наҥгае,

Йӧратыме поэзий йолташем!

Тений Марий АССР-ын Калык поэтше Миклай Казаковлан 100 ий темын. Тиде чапле лӱмгече вашеш краеведений да периодике пӧлкаште Н.И.Казаковын илышыж ден творчествыж нерген каласкалыше книга ончер ышталтын. Талантан поэт ӱмыржӧ мучко сылнымут мастарлык верч тыршен, тӱнямбалсе поэтике тӱвырам лым лийде шымлен шоген. 

Руш календарьыште ӧрыктарыше дате уло — Ильи Муромецын кечыже. Тудо 1 январьыште палемдалтеш. Тиде кечын шочмо мландылан вуйым савен, тудын патырже-влакын данле подвигыштым шарналтат.

2018 ийын икымше кечылаштыже  1-6 класслам обслуживатлыше секторышто «Руш мландын патырже-влак» ончер-кроссвордшо почылтын. Самырык лудшо-влаклан да нунын ача-аваштлан  Илья Муромец да моло патыр-шамыч нерген, нунын геройло пашашт нерген книга-влакым вераҥдыме. 

Пагалыме лудшо-влак!

Тендам У ий да Рошто пайрем дене саламлена.

Паша радамыштына вашталтыш-влак дене палдарена: 

25, 26, 27, 28 да 29 декабрьыште книгагудо  9.00 — 18.00 шагат марте пашам ышта
30 декабрь — санитар кече 
31 декабрь, 1, 2, 3 январь — каныш кече-влак 
4 да 5 январь — книгагудо 9.00 — 16.00 шагат марте ышта 
6, 7, 8 январь — каныш кече-влак 
9 январь гыч книгагудо ондакысе паша радам денак пашам ышта.

Книгагудышкына пагален ӱжына!

Кажне ийын У ий вашеш мемнан книгагудышто у ий модышым ыштыме конкурс эрта. Тений тудо 2018 ийын символжылан — Пийлан — пӧлеклалтын.

Конкурсышто тӱрлӧ ийготан йоча-влак шке моштымашыштым тергеныт. Нуно макраме, пидме, ургымо модыш-шамычым, тыгак пу, кагаз, папьемаше, аппликаций йӧным кучылтыныт. Конкурсыш 300 утла паша пурен.

Жюрилан паша-влакым аклаш куштылго огыл ыле. Вет чыла модышат сӧрал, шкешотан лийын.

Туге гынат сеҥыше-влакын лӱмышт пале лийын!

Книгагудышто  «Мый да закон» Права лӱдыкшыдымылык школын черетан занятийже лийын. Тудын темыже: «Илыш да тазалык ваштареш преступлений». Занятийым Марий Эл Республикысе МВД-н Следственный управленийже гыч старший следователь Н.Ф. Файзрахманов ден 3-шо номеран ОП-ын ийготыш шудымо йоча-влак дене пашам ыштыше О.С. Новоселова эртареныт.

Занятийыште йоча-шамыч правам пудыртымашын видше-влак нерген, кузе тудын деч кораҥаш — мутланеныт. Поснак пычкемыш уремыште шкемым кузе кучымо нерген йодышым тарватеныт. Икшыве-шамычлан «комендант шагат» нерген ушештареныт, ача-аван шке шочшышт верч мутым мо верч кучымо нерген шижтарен ойленыт. Мутланымаш годым илыш гыч примерым конденыт. Йоча-влак правам аралыше орган пашаеҥ-шамычым моткоч тӱткын колыштыныт да ятыр йодышлан вашмутым налыныт.