Кажне калыкын шке талешкыже-влак улыт. Руш калык Александр Невскийым, Дмитрий Донскойым пагален шарна, татар — Габдулла Тукайым, Сююмбикем, башкир — Салават Юлаевым… Марий калык гын Чумбулат, Мамич Бердей, Болтуш, Акпатыр дене кугешна.  «Марий ушемын» пунчалже почеш 26 апрельым Марий талешке кече семын палемдена. 

 26 апрельым таклан огыл ойыреныт: истрийым ончалаш гын, 18-ше курымышто Малмыж орым арален налме годым Болтуш лӱман он шочмо эл верч шогышыжла  патыр семын колен. Талешке-влак  нерген ятыр преданий ден легенде-влак, йомак ден муро-шамыч тачат аралалтыт. Ме тыланда акрет годсо талешке-влак нерген книга-шамычым лудаш темлена.

 Экологий ийыште йырым-йырысе пӱртӱс дене кылдалтше йодыш-влак самырык-шамычымат ӧрдыжеш огыт кодо. 2017 ий 4 апрельыште книгагудышто «Олан экологий книгаже» мутланымаш шагат эртен.

 ХХ курымын кокымшо пелыштыже айдеме тукым Сандалыкын лондемышкыже тошкалын. Тушко корным мемнан элна почын: Мландын икымше искусственный спутникшым Совет Союзышто колтымо, тӱнямбалсе икымше космонавт — СССР-ын гражданинже Юрий Алексеевич Гагарин.

Космонавтикын кечыж вашеш, 11 апрельыште,  Торгово-технологический колледжын студентше ден Национальный президентский  школ-интернатын тунемшышт-влаклан книгагудышто «Тудо сандалык курымым почын» лӱман  Гагарин урок лийын.

Мурет мотор — чодыра пеледыш,

Мурет вет тыйын ший аршаш…

Марий калыкын уста поэтше Олык Ипайын лӱмжӧ сылнымутыштына шӧртньӧ буква дене возалт кодын. Тений тудын шочмыжлан 105 ий темын. Мемнан книгагудын конференц-залыштыже «Марий каван пӱркытшӧ» лӱман вашлиймаш эртен. Тушко Олык Ипайын творчествыжым аклыше да пагалыше-еҥ-влак толыныт, тиде — Марий кугыжаныш университетын 1-ше курсыштыжо тунемше студент-влак ден уна-шамыч. Нунылан поэтын илыш да творчествыж нерген каласкалыше мультимедийный презентацийым темлыме ыле. 

 Шошо каныш жапыште оласе 16-шо номеран школ гыч йоча-влак «Корней коча дек унала» квест-модышышто лийыныт. Тудо кумдан палыме йоча писатель Корней Иванович Чуковскийын юбилейжылан пӧлеклалтын. Йоча-влакым «Крокодил» йомак гыч персонаж-шамыч — Тотоша ден Кокоша — вашлийыныт.

27 ӱярнян Йоча книга арняште 9 номеран  общеобразовательный школын тунемшышт дене пырля интерактивный путешествий эртен. «Жапым йомдарыме нерген йомакыште» йоча-влак кузе жапым аныклаш, писын лудаш, мӧҥгысӧ пашам сайыш шукташ лийме йодышым каҥашеныт.  

 «Канде кайык» гимназийын 3 классыште тунемшыже-влак кумдан палыме «Марий Чодыра» Кугыжаныш парк мучко  виртуальный экскурсийым ыштеныт. Тыгай мероприятий Экологий ийлан пӧлеклалтын. Парк мемнан республикыште веле огыл, тыгак ӧрдыж кундемлаштат палыме.