7 декабрьыште мемнан деке унала Йошкар-Оласе 17-ше номеран школысо 2-шо класс толын ыле. Йоча-влак «Книгаола» дене палыме лийыныт, а туштыжо проспект ден урем олмеш — книга стеллаж-влак, этаж олмеш — книга шӧрлык, пӧрт олмеш — книга том-шамыч.

Тунемше-влак  книгагудын кажне пӧлкаштыже лийыныт, пален налыныт — мо тугай формуляр, абонемент, каталог, периодике. А  эше сылнымут викториныште йодыш-влаклан вашмутым пуэныт, туштым туштеныт, мурым муреныт, оригами йӧн дене книга закладкым ыштыме мастар классыште участвоватленыт.

Пагалыме йолташ-влак!
23 ноябрьыште «Российын символжо-влак» Всероссийский олимпиаде лийын. Тудо регионласе чыла тунемше-влакын кок тӱрлӧ ийготан категорий коклаште (8 — 10 ийготан-влак да 11 — 14 ийготан-влак) эртен. Олимпиадыште чылаже Россий Федерацийысе 82 регион гыч 39 143 участник 1442 площадкыште таҥасен.
Мемнан республик гыч Олимпиадыште 99 тунемше участвоватлен.

Ме уло кумылын сеҥыше-влакын лӱмыштым увертарена! Теве нуно:

• 8-10 ийготан-влак категорийыште Звенигово поселко гыч Дания Ганеева ден Йошкар-Ола гыч Максим Удалов, коктынат икгай кӱкшӧ баллым погеныт.
• 11-14 ийготан-влак категорийыште Марий Турек районысо Карлыган ял гыч Мария Федотова.

Уло кумылын саламлена!

Нуно диплом ден книга пӧлекым налыт. Чыла участниклан именной сертификатым кучыктат.

10 декабрь — Марий тиште кече. Тудо кугыжаныш пайрем семын палемдалтеш да 1998 ий годсек эртаралтеш.

 1775 ийыште «Сочинения, принадлежащие к грамматике черемисского языка» лӱман икымше марий грамматике ош тӱням ужын. Тудым Озаҥ оласе новокрещенский школышто тунемше-влак архиепископ В. Пуцек-Григоровичын вуйлатымыж почеш ямдыленыт. Тиде пагыт гыч марий книга савыктыш тӱҥалтышым налын. Грамматике марий тиштым вияҥдымаште кугу рольым модын.
Краеведений да периодике пӧлкаште Марий тиштылан пӧлеклалтше «Шочмо йылме, кугешнем тый денет» книга ончерым вераҥдыме. Тушко марий возыктышын шочмыж гыч  тӱҥалын, тачысе савыктыш нерген литературым чумырымо. Ончерын ик ужашыже мутер-влаклан пӧлеклалтын.

Кажне ийын 1 декабрьыште СПИД ваштареш кучедалме кече палемдалтеш. Тыгай темлымашым икымше гана Тӱнямбалсе тазалык аралтыш организаций ыштен. Тудым 140 эл  сайлан шотлен. ВИЧ деке тыгай тӱткылык арам огыл лийын: Тӱнямбалсе тазалык аралтыш организацийын палемдымыж почеш, мландӱмбалне 37 миллион утла айдеме шучко чер дене ила.

Мемнан книгагудыштына «Ончыклык — СПИД деч посна» самырык тукым акцийым эртарымаш поро йӱлаш савырнен. Тудын участникше 14 ий деч кугурак ийготан самырык еҥ лийын кертеш. Тений мемнан дек Торгово-технологический колледжын тунемшышт-влак толыныт ыле. Акцийын тӱҥ шонымашыже — XXI-ше курымын шучко черже ваштареш кучедалме проблеме дек еҥ-влакым мелын савыраш.

Марий йоча фольклор – марий калык ойпогын ойыраш лийдыме ужашыже. Курымла дене вияҥ толмо семын, тудо кушкын толшо тукымым воспитатлымаште кугу верым налеш.

Марий калык ожнысек шке икшывыжын модышыж деке тӱткӧ лийын да шкежат модмаште  ӧрдыжеш кодын огыл. Вет тӱрлӧ модыш  дене модын, йоча шочмо  калыкшын тӱвыражым, йылмыжым, чон поянлыкшым келгынрак шижаш тӱҥалеш. Марий модышлаште шуко мыскара, тӱрлӧ койдарчык вашлиялтыт. Нуно весела, проста да кажне икшывылан умылаш йӧршӧ улыт.

«Леве кече» социальный проект негызеш Йошкар-Олаште «Шӱртӧ дене тӱня мучко» поро паша акций тӱҥалын. Тудо ача-ава деч посна кушшо йоча-влаклан полшымо амал дене эрта.
19 ноябрьыште «Леве кече» усталык вашлиймашыште ашнаш налше еш-влакын «МариЯ» лӱман Ассоциацийже гыч кумылан еҥ-влак пледлан квадратым пидаш туныкташ тӱҥалыт. Мыланна меж шӱртым, акрил шӱртым пӧлек шотеш пуаш кумылан-влак лектыт  гын, кугу таум ыштена.

Адак толын лектым ты верыш,

Мондалтдыме ӱмыр аҥаш,

Игече тайнен шыже велыш,

Ийгот кӱшта чонлан айнаш.

Но мый толынам шошо мландыш,

Пӱртӱсшӧ — латшым ияш гай.

Тора жапын сынже — ош ландыш,

Йоҥга оҥгырлаже лыжган.

З.Дудина.

16 ноябрьыште В.Х.Колумб лӱмеш Республикысе йоча да самырык-влаклан книгагудышто кумдан палыме поэт Зоя Дудина дене творческий вашлиймаш эртен. Тудо Зоя Михайловнан чапле лӱмгечыжлан да «Доля земная» книга презентацийжылан пӧлеклалтын.