Калык ойпого — кажне калыкын аклаш лийдыме поянлыкше. Тудын гочын йоча шке йылмыжым йӧраташ веле огыл, тыгак  кугезе коча-кован чон поянлыкшым шымлен, пален налеш, икымше тӱняумлымашыже почылтеш. Фольклор  мемнам тукымвожна деке чакрак ышта, тугеже ожнысо пагыт дене кылым шочыкта. 21 февральыште Российыште  Тӱнямбалсе шочмо йылмын кечыже палемдалтын. Тиде кечын мемнан книгагудына Ульяновысо Фондын эртарыме «Мемнан тукымвожна. Калык ойпогым лудына» Всероссийский акцийыш ушнен. Тиде кечын участник-шамыч «Марий мландын патырже-влак» йӱкын лудмашыште,  «Модыш, мыскара, койдарчык» калык ойпого пайремыште моштымашыштым ончыктеныт, «Европын пытартыш чимарийже-влак» лӱман книга ончерым ужыныт.

Книгагудын ончер пӧлемыштыже «Юзо лаштык» ончер почылтын. Радынан авторышт-влак — Калыкле президент сымыктыш школын тунемшышт. Кажне паша тӱс, композиций, тематике да кумыл дене ойыртемалтыт. Но нуным ик секрет уша: кажне радынашке лаштыкым шылтеныт. Тудыжо посна кумылым луктеш. Самырык сӱретче-влакын пашаштым аклаш кумылда уло гын, мемнан деке пагален ӱжына. Кажне кечын (шуматкече деч молыжо) 9 гыч 16 шагат марте вучена.

Книгагудыш пагален ӱжына!

Ӱярня — весела пайрем. Еҥ-влак Ӱярня арня жапыште муро да мелна дене телым ужатен, шошым вашлийыт, тер дене мунчалтат, гармонь почеш мурат. Ойленыт, пуйто тиде пайремым кузе вашлият, ий мучко тугак илаш тӱҥалат. Теве 9-ше школын 3-шо классыштыже тунемше-влакланат Ӱярням ончалаш пеш весела ыле. Ӱдыр ден рвезе-влаклан пайрем йӱлан кузе эртымыже моткоч келшен. 

Книгагудышто «Мый Пушкин дек унала вашкем!» сылнымут путешествий эртен. Тудо А.С. Пушкинын йомакше-влак негызеш лийын. Изи лудшына-влак поэтын ятыр  сылнымут корнылажым наизусть палымышт куандарен. Вет кугу талантан поэтын произведенийже-влак кажне гана лудмо годым оҥай да кумылым налын моштышо кодыт, пуйто нуным икымше гана лудмо гай чучеш.

Пагалыме лудшо-влак!
Тендам Элым аралышын кечыж дене саламлена!
Паша радамыштына вашталтыш-влак дене палдарена:
22 февраль — книгагудо 9.00 — 17.00 шагат марте ышта
23, 24, 25 — каныш кече-влак
28 февраль — санитар кече
Книгагудыш толмыда годым шотыш налза.

 2018 ий 22 февральыште В.Х.Колумб лӱмеш Республикысе йоча да самырык-влаклан книгагудышто «Книгагудо да самырыктукым: иктешлымаш ден ончыклык паша» семинар-совещаний  лиеш.

Марий Эл Республикысе муниципальный район-влакын Тӱҥ да межпоселенческий книгагудо пашаеҥышт 2017 ийыште самырык-влак дене пашам ыштымыштым иктешлат. Вашлиймашын унаже-влак кушкын толшо тукымым книгагудо деке утларак мелын лияш манме йодышым тӱҥ верыш шындат. Нуно шке паша опытышт дене палдараш тӱҥалыт. Адакшым волонтёр-шамычым ты пашаш кумылаҥдаш шонымашат илышыш шыҥдаралтшаш.

Мероприятий  10.00 шагатлан тӱҥалеш.