«Леве кече» социальный проект негызеш Йошкар-Олаште «Шӱртӧ дене тӱня мучко» поро паша акций тӱҥалын. Тудо ача-ава деч посна кушшо йоча-влаклан полшымо амал дене эрта.
19 ноябрьыште «Леве кече» усталык вашлиймашыште ашнаш налше еш-влакын «МариЯ» лӱман Ассоциацийже гыч кумылан еҥ-влак пледлан квадратым пидаш туныкташ тӱҥалыт. Мыланна меж шӱртым, акрил шӱртым пӧлек шотеш пуаш кумылан-влак лектыт гын, кугу таум ыштена.
«Шӱртӧ дене тӱня мучко» поро акций
Зоя Дудина: у книган презентацийже
Мондалтдыме ӱмыр аҥаш,
Игече тайнен шыже велыш,
Ийгот кӱшта чонлан айнаш.
Но мый толынам шошо мландыш,
Пӱртӱсшӧ — латшым ияш гай.
Тора жапын сынже — ош ландыш,
Йоҥга оҥгырлаже лыжган.
З.Дудина.
16 ноябрьыште В.Х.Колумб лӱмеш Республикысе йоча да самырык-влаклан книгагудышто кумдан палыме поэт Зоя Дудина дене творческий вашлиймаш эртен. Тудо Зоя Михайловнан чапле лӱмгечыжлан да «Доля земная» книга презентацийжылан пӧлеклалтын.
«Леведыш ӱмбалне илыше Карлсон». Интерактивный викторине
«Шӱклаш огыл, а моторлыкым шочыкташ»: фоторамкым ышташ мастар класс
Ремонт пытен, а у обой гыч кодшо лаштык-влак дене мом ышташ? Изишак тыршымашым пышташ да фантазий кумылым лукташ гын, шкешотан да кӱлешан пӧлекым ышташ але пӧлемым моторын сӧрастараш лиеш.
Обойлан у шӱлышым пурташ шуко йӧн уло. Ме тыглай вариантым темлена — фоторамкым ышташ.
«Шӱклаш огыл, а моторлыкым шочыкташ» мастар классыш пагален ӱжына,
тудо 12 ноябрьыште 11.00. шагатлан тӱҥалеш.
Тендам 304-ше пӧлемыште вучена.
Мастар класслан тӱлымӧ ак: 100 теҥге, книгагудын лудшыжо-влаклан — 75 теҥге.
«Шӱмыштӧ шочшо сем-влак»
Яков Андреевич Эшпайын лӱмжӧ мемнан республикыште веле огыл, элна мучкат сайын палыме. Тудын усталык пашаже шуко тӱрлӧ шӧрынан. 21 ноябрьыште книгагудын ончер пӧлемыштыже марий семым йӧратыше-влак Я.Эшпайын «Шӱмыштӧ шочшо сем-влак» лӱман усталык портретше дене палыме лийын кертыт.
Мероприятий 12.00. шагатлан тӱҥалеш.
Книгагудыш пагален ӱжына!
«Ме — элнан ужашыже, ме — Российын ик лукшо»
4 ноябрьыште уло элна кугыжаныш пайремым — Калыкын икоян улмо кечыжым — пайремла. Тений Марий автономийым ыштымылан — 97 ий. Марий Эл Республикына Российын пӱрымашыж дене ойыраш лийдымын кылдалтын. Тиде жапыште экономике, тӱвыра, илышкыл иксемын кылдалт вияҥыныт, марий калыкна шкенжын калык йӱлажым, шӱм-чон поянлыкшым арален коден кертын.
Мемнан книгагудысо краеведений да периодике пӧлкаште пайремлан пӧлеклалтше книга ончер почылтын. Тушко марий калыкнан историйже, тӱвыраже, илыш-йӱлаж нерген литературым чумырымо.
Зоя Дудина дене пырля
2017 ий 16 ноябрьыште В.Х.Колумб лӱмеш Республикысе йоча ден самырык-влаклан книгагудышто марий поэтессе Зоя Дудинан «Доля земная» рушла лекше книгажын презентацийже лиеш.
Зоя Михайловна — 11 поэзий книган авторжо, М.А.Кастрен лӱмеш сылнымут премийын лауреатше (2000, Финляндий), «Марий Элын идалыкысе книгаже» конкурсын лауреатше (2006), Марий Эл Республикысе тӱвыран сулло пашаеҥже (2000), Россий писатель ушемын еҥже ( 2002 ий гыч). Поэтессын почеламутшо-влакым финн, эстон, венгр, лив да моло йылмылашке кусарыме. Тудо тӱрлӧ йылмыласе сылнымут произведений-влакым марий йылмыш ятыр кусарен да кызытат тиде пашалан шуко вийым да жапым ойыра.
Зоя Дудина тӱрлӧ жанран почеламутым серыме дене ойыртемалтеш. Тудын творчествыштыже чыла гаяк лирический жанр ден формо-влак вашлиялтыт: сонета, муро, элегий да т.м. З.Дудинан поэзийыштыже ойыртемалтше жанр семын кумалтыш мут дене возымо почеламутшо-влакым шотлыман. Авторын сылнымут пашаже кызытсе марий литературыштына кӱкшӧ да кумда верым айла. Илышын шере-кочыж нерген шонкален, поэтессе лирический геройжо-влак дене пырля куана, шортеш, йӧрата…
Марий поэзийын поро йолташыже-влакым Зоя Дудина дене творческий вашлиймашыш пагален ӱжына. Тудын у книгаж дене палыме лияш сай йӧн уло!