Кушкын толшо тукым яра жапым кузе эртара? Шуко ятыр йодыш самырык ончылно шога. Кузе йолташ-влакым муаш? Кӧ лияш? Чын йӧратымашым муаш манын, мом ыштыман? Лудаш кумылдымо-влаклан могай книгам темлыман?

Самырык еҥлан книга сай йолташ лийын кертеш. Кажне айдеме шканже келшыше произведенийым лудаш ойыра. Тиде — чоным тарватыше классический литератур але шонаш таратыше кызытсе сылнымут. Ятыр книга коклаште чонлан келшышыжым ойыраш «У книга-влакын компасше» лӱман сылнымут обзор полшен кертеш. 

Книгагудыштына Йоча книга арня «Книгам йӧратыше-влакын отрошкышт путешествий» лудмо акций дене мучашлалтын. Тудо лудшына-влак коклаште  шукертак пагалымашым сулен.

Тиде кечын № 76-шо номеран йочасадысе икшыве-влакым Н. Носовын «Приключения Незнайки и его друзей» йомакысе герой-шамыч вашлийыныт. Герой-влакын рольыштым книгагудын ӱшанле лудшыжо-влак — Тимофеев Аким, Солдатов Илья, Ибрагимова Венера да молат — шкак модыныт. Нуно йолташышт-влакым книгам йӧраташ ӱжыныт.

Йомак — умбак, мый — тембак,

Шелше кӱмыж — коҥгамбак!

          Йомак – уш-акылым пойдарыше негыз. Весела да шӱлыкан, шучко да оҥай йомак-влак мыланна изи годсек палыме улыт.

«Детство» лӱман Психолого-педагогическйи рӱдер гыч «Ромашка» группын воспитанникше-влак икымше гана книгагудыш толыныт да Йоча книга арнялан пӧлеклалтше оҥай мероприятийыште участвоватленыт.  «В тридесятом царстве» лӱман интеллектуальный лото йоча-влакым йомак тӱняшке коштыктен.

Нуно йомакын шочмыж нерген пален налыныт. Викторинысе йодыш-влаклан вашмутым пуымеке, икшыве-шамыч «Сестрица Аленушка и братец Иванушка», «Гуси-лебеди», «По щучьему велению», «Морозко» да моло йомак-влакымат шарналтышт.

Ятыр видео-йодыш ден тушто-влаклан вашештымек, йоча-влак изирак пӧлек дене палемдалтыныт.

 ХХ-шо курым тӱҥалтыште писатель Максим Горькийын лӱмжӧ  Л. Толстой да А.Чеховын лӱмышт дене тӧр шындалтын, кеч Горький нунын тунемшышт веле лийын. 1900-ше ийла тӱҥалтышыште тиде писательын произведнеийже-влак икмыняр шӱдӧ тӱжем экземпляр дене савыкталтыныт. Тудын дене ятыр еҥ келшымашым кычалын: меркалыкын лӱмлӧ айдемышт, тале литератор-влак  В.Г. Короленко, Н.К. Михайловский, А.Ф.Кони, П.Н. Милюков, П.Б. Струве 1899 ийыште самырык писатель лӱмеш Петербургышто банкетым ыштеныт, тудым уремыштат шукын паленыт. Вес эллаште Стефан Цвейг, Ромен Роллан, Марк Твен тудлан сай акым пуэныт. Тений Максим Горькийын шочмыжлан 150 ий. Тиде лӱмгечылан пӧлеклалтын «Тӱняште Айдеме лияш» кас-портрет. 

Шошо каныш жапыште Россий мучко Йоча книга арня эрта. Икымше гана Йоча книга пайрем 1946 ий 26 мартыште йоча писатель Лев Кассильын шонымашыж почеш эртен. Тудо «Книган лӱмгечыже» маналтын.

 25 гыч 30 март марте ме книгагудышто йоча-влакым вучена! Нине кечылаште ятыр оҥай мероприятий эрта: писатель-влак дене творческий вашлиймаш, сылнымут пайрем, у книга презентаций, мульсеанс ден мастар класс-влак.

В.Х.Колумб лӱмеш Республикысе йоча да самырык-влаклан книгагудо шошо каныш жапыште тунемше-влакым  «Паледа мо Книган пӧртшым?» лӱман интерактивный экскурсийыш пагален ӱжеш. Модыш путешествий тендам книгагудын чыла пӧлка ден пӧлемышкыже намиен коштыкта. Тыгак те книгагудына кӧн лӱмжым нумалше еҥ нерген лишкырак пален налыда.

Ак 30 теҥге.

Ончылгоч возалташ телефон 34-15-12.

Книгагудыш пагален ӱжына!

Поэзий кумылан еҥлан
Йӱржат ок ыште лавырам,
Лумат ок петыре йолгорным.
Поэзийлан кеч-кушто — корно…

Поэзий – айдеме тукымын ик эн кӱкшӧ сеҥымашыже, очыни. Шонымашым почеламут корнылашке пыштен, рифмылашке кумылым велен, ончыклыкым шонен да эртышым шарнен, миллион еҥ деке шуктен да тыгодымак шке кумылет пелен кодаш — тидым лач поэзий гына ыштен кертеш. 21 мартыште, Поэзийын тӱнямбал кечынже, ме шке лудшына-влаклан куанле пайремым пӧлеклышна: книгагудын ончер пӧлемыштыже марий поэтессе, МАССР-ын сулло туныктышыжо Зинаида Васильевна Ермакова дене творческий вашлиймашым эртарышна. Тиде авторым ме «Садеран рвезылык», «Садеран корнывожышто», «Чоя Марусь», «Тек куржыт ий-влак»  книгала гоч палена.

Шошо каныш жапыште элнан чыла книгагудылаштыже Йоча книга арня эрта. Мемнан книгапӧртыштӧ тудо молгунамсе семынак «Лудаш, тӱням саемдаш манын!» девиз почеш лиеш. 25 гыч 30 март марте лудшына-влак ятыр оҥай мероприятийыш толын кертыт: писатель-влак дене творческий вашлиймаш, у литератур дене палыме лиймаш, сылнымут пайрем, викторине, конкурс, лудмо акций-влак кумылан-шамычым вучат.

Йоча книга арня икымше гана «еш» каныш дене иктеш толеш. Еш дене пырля оҥай лудмаш поэтессе Жанна Кулалаева дене тӱҥалеш. Тудо туныктен ойлымо йомакше-влак дене палдара. Пайремым «Гармония» усталык ушемын концертше, сылнымут конкурс ден викторине, модыш-влак шуят, йоча-влак ача-ава дене пырля мастар класслаште, еш квест-модышышто участвоватлен кертыт.

 Книгагудыш пагален ӱжына!