Марий Эл Республикысе Олык Ипай лӱмеш кугыжаныш самырыктукым премийлан тений 50 ий. Тыгай премий сылнымут, тӱвыра да сымыктыш аланыште  тыршыше еҥ-влаклан пуалтеш. 1968 ийыште, комсомоллан 50 ий темме жапыште, ВЛКСМ Марий обком республикысе самырык талант-влакым кумылаҥдымашлан премийым ышташ да тудлан Олык Ипайын лӱмжым пуаш палемденыт.

Олык Ипай – марий калыкын уста поэтше. Тудын лӱмжӧ шочмо сылнымутышкына шӧртньӧ буква дене возалт кодын. Тудо кӱчык ӱмырым – 25 ийым — гына илен. Но илыме курымыштыжо моткоч шуко пашам ыштен коден: 10 ияшак икымше почеламутым возен, 16 ияш сылнымутыш пеҥгыдын шогалын, 20 ияш писатель ушемыш пурен. 10 ий жапыште 10 поэмым, 2 йомакым, ятыр почеламутым, ойлымаш ден очерк-влакым серен, шуко кусарыме пашам шуктен.

Олык Ипай лӱмеш лауреат лӱмым эн ондак комозитор Эрик Сапаев да поэт Валентин Колумб налыныт. В.Колумблан тиде лӱмым «Эре чоҥешташ, чоҥешташ» почеламут сборникшылан да «Абакан – Тайшет» кӱртньыгорным  ыштыме нерген «Келшымаш ола» очерк книгажлан пуымо. А композитор Э.Сапаев  ятыр мурын да «Акпатыр» икымше марий оперын авторжо семын историеш кодын.

1994 ийыште премий «кугыжаныш» манме премийыш савырнен. 2008 ий гыч лауреат-влаклан диплом дене пырля у оҥпалым – медальым – пуаш тӱҥалыныт. 50 ий жапыште ятыр сӱретче, семмастар, мурызо, писатель ден поэт тыгай лӱмым сулен. Нунын коклаште поэт-влак С.Николаев, А.Иванова, А.Тимиркаев, артист-влак Г.Иванова-Ямаева, И.Смирнов, И. Актуганов, сӱретче-влак З.Лаврентьев, М.Клюкина, О.Боголюбов да молат. Марий кугыжаныш университетын да И.С. Палантай лӱмеш тӱвыра да сымыктыш колледжын студентышт-влак дене вашлиймашыш Олык Ипай лӱмеш кугыжаныш премийын лауреатше-влак мурызо, поэт Татьяна Соловьева ден Марий самырык театрын актрисыже, мурызо Любовь Купсольцева толыныт.

Кӧ тыгай «Ушан-влак»? —

Весела компаний,

Вияҥда уш-акылым,

Пластикым да тӱткышым.

Эн изи лудшына да нунын ача-аваштлан  «Умничка» модыш клуб угыч шке омсажым почын. Вашлиймашыште Олег Бундурын да Александр Прокофьевын почеламутыштым лудыныт. Нуно пакчасаска ден емыж-саскалан пӧлеклалтыныт.

Изи Ушан-влак юзо ужар аланыште пакчасаска ден емыж-саскам погеныт, тамле компотым шолтеныт да кугыеҥ-влак дене пырля тамленыт.

Модыш дене модмаш, почеламутым лудмаш чылаштым иктыш ушен.

Изи Ушан-влак у йолташым кажне кугарнян 11 шагатлан вучат.

Йӧратен тендам вашлийыт ,

Пашам ыштат чон ден!

 «Ушан» деке йоча-влак толыт 

Кугу кумыл ден!

Вучена тендам книгагудышто!

18 сентябрьыште мемнан книгагудын лудшыжо-влаклан «Мый да закон» Лӱдыкшыдымылык правовой школ шке пашажым угыч тӱҥалын. Школысо занятий-влакын программыжым Марий Эл Республикысе МВД-се Следственный управленийын специалистышт дене чоҥымо. Тудын тӱҥ задачыже — кушкын толшо самырык тукым коклаште преступность шотышто профилактикым эртарымаш.

Лӱдыкшыдымылык правовой школын икымше колыштшыжо-влак Т. И. Александрова лӱмеш 11-ше номеран лицейын 8 «Э» классыштыже тунемше-шамыч лийыныт. Нунылан «Уголовный да административный ответственность» лӱман  икымше занятийым эртареныт.

Мемнан книгагудысо ончер пӧлемыште скрапбукинг йӧн дене ыштыме персональный паша-влакым ужаш лиеш. Тудын авторжо — Татьяна Черёмухина. Тудо шке пашажым туге йӧратен шынден, эсогыл профессионал марте кушкын.

Ончерыш толмеке, те ужыда, кузе оҥайын сӧрастараш лиеш открыткым, блокнотым, паспорт комым да тулеч молымат. Нуно чыланат моткоч сӧрал улыт. Татьяналан  «скрап» —  тиде тӱням сӧрастарыше хобби веле огыл, а уло илыш. 

Романов-влак — Российыште улшо кугыжа да император-влакын кугу династийже. Тиде акрет тукым 16-шо курым мучаш гыч тӱҥалтышым налеш.

9-ше номеран школын 9-ше классыште тунемше-влаклан мемнан пашаеҥна-шамыч историй экскурсым эртареныт. Тудо Романовмытын Пӧртыштлан 450 ий темме лӱмеш пӧлеклалтын. 

Шыже пагыт, кунам йырваш шӧртньӧ лышташ кия, а кече эше ырыкта -«Умничка» йоча клублан почылташ сай жап. 9 сентябрьыште самырык лудшо-шамыч «Шыже чия» модмо шагатын участникше-влак лийыныт.

Йоча-влак кугу кумыл дене шыже нерген почеламут-влакым колыштыныт, йодыш-влаклан вашештеныт, тушто-влакым туштеныт, а шыже кожласе изи аланыште «коштмышт» да  лышташым погымышт годым пален налыныт, молан шыжым тӱрлӧ тӱсан маныт. Ӱстелысе курчак театр йоча влаклан  кожла янлык-шамычын: виян мераҥ, пашазе шоҥшо, полмезе ур да ушан маскан модмыштым ончыктен.  Нуно кузе йӱштӧ телылан ямдылалтмышт нерген каласкаленыт.